ვამბობდით, რომ ოპოზიციის ასეთი დესტრუქციული ქმედებები, მათ საბოლოო ჯამში პოლიტიკურ ჩიხამდე მიიყვანდა და ძალიან დიდი ალბათობით, ჩვენ ამას ვხედავთ, – ამის შესახებ პარლამენტის ვიცე-სპიკერმა, გიორგი კახიანმა „დღის ქრონიკაში“ განაცხადა.
მისი თქმით, ოპოზიციამ უნდა ისარგებლოს იმ მანდატით, რაც მათ მოსახლეობის ერთმა ნაწილმა მიანიჭა.
„ვამბობდით, რომ ოპოზიციის ასეთი დესტრუქციული ქმედებები, მათ საბოლოო ჯამში პოლიტიკურ ჩიხამდე მიიყვანდა და ძალიან დიდი ალბათობით, ჩვენ ამას ვხედავთ. ამის გამოხატულებაა ის რადიკალური განცხადებები, რასაც ოპოზიციის ზოგიერთი წარმომადგენლისგან ვისმენთ. ახლა საუბარი დაიწყეს იმაზე, რომ თითქოს, რაღაც კონსტრუქციული ნაბიჯი გადმოდგეს და ხელახალ კი არა, ვადამდელ არჩევნებს ითხოვენ. არ ვიცი, ამაში თვითონ რა განსხვავებას ხედავენ. თუ იმას გულისხმობენ, რომ საპარლამენტო ცხოვრებაში მიიღებენ მონაწილეობას და შემდგომ საპარლამენტო ტრიბუნიდან იფიქრებენ საპარლამენტო არჩევნებზე, არ ვიცი თუ ეს ლოგიკაა ამაში ჩადებული, მაგრამ ყველა შემთხვევაში, ყველანაირი სწორი განვითარება და ყველანაირი ლოგიკა მიდის იქით, რომ ოპოზიციამ უნდა ისარგებლოს იმ მანდატით, რაც მათ მოსახლეობის ერთმა ნაწილმა მიანიჭა. მოლაპარაკების მესამე რაუნდი, ფაქტობრივად ყველაფერი მზად არის იმისთვის, რომ მესამე შეხვედრა შედგეს და ვიმედოვნებ, რომ ეს შეხვედრა ორივე მხარისთვის მისაღები შედეგით დასრულდება და საბოლოო ჯამში ჩვენ ოპოზიციას ვიხილავთ საპარლამენტო ცხოვრებაში“, – განაცხადა გიორგი კახიანმა.