რა კონკრეტულ ნაბიჯებსა და პასუხისმგებლობებს იღებთ პარლამენტისა და ჩვენი კომიტეტის წინაშე იმისთვის, რომ მიწის რეფორმა სათანადოდ განხორციელდეს, – ამ საკითხით პარლამენტის პლენარულ სხდომაზე, გარემოს დაცვისა და ბუნებრივი რესურსების კომიტეტის თავმჯდომარე დაინტერესდა.
ნინო წილოსანმა შეკითხვით პრემიერობის კანდიდატს, გიორგი გახარიას მიმართა.
„მიწის რეფორმა, რომელიც ჩვენი კომიტეტისა და სამინსიტროს მიერ დაიწყო და 2019 წელს მიწის კანონითა და თანმდევი კანონების მიღებით დასრულდა, არ მიმდინარეობს სათანადოდ. 2020 წელს შექმნილი მიწის სააგენტო, რომელსაც მხოლოდ დოკუმენტური ბაზა უდნა მოეწესრიგებინა და მხოლოდ სამი დადგენილება უნდა მიგეღოთ მთავრობას. ვგულისხმობ მიწის ბალანსის აღრიცხვის წესს, კატეგორიების ცვლილებასა და ანაზღაუირების წესს. არც ერთი არ არის შესრულებული, რაც აპრიორი გულისხმობს, რომ მეტი კონცენტრირება და ყურადღება არის საჭირო. სოფლის მეურნეობის სექტორში მონაწილე ყველა მხარესთან კონსულტაციების დროს აღმოჩნდა, რომ ვერცერთ რეფორმას ვერ გავაგრძელებთ, თუ ჩვენ არ გვექნება მიწის ფონდი. რა კონკრეტულ ნაბიჯებსა და პასუხისმგებლობებს იღებთ პარლამენტისა და ჩვენი კომიტეტის წინაშე იმისთვის, რომ აღნიშნული რეფორმა სათანადოდ განხორციელდეს“, – განაცხადა წილოსანმა.