რევოლუციაზე საუბრით ოპოზიციას სურს, გააძლიეროს დასავლეთის ზეწოლა ხელისუფლებაზე, ეს უბრალოდ სასაცილოა. რომელ ზეწოლაზეა საუბარი, როდესაც პარალელურად სწორედ დასავლეთი მოუწოდებს ოპოზიციას პარლამენტში შესვლისკენ, – ამის შესახებ ტელეკომპანია „იმედის“ გადაცემაში „იმედის ფაქტორი“ სოციალური უსაფრთხოების ექსპერტმა, რუსუდან თევზაძემ განაცხადა.
„ჩემი აზრით, ბევრ დროს ვუთმობთ ოპოზიციაზე საუბარს, თუმცა სხვა გზა არ გვაქვს. ცხადია, არავის სურს ასეთი პოლიტიკოსების ხილვა პარლამენტში, მაგრამ სოციალური თანასწორობის კომპონენტში მნიშვნელოვანია, რომ მათ ამომრჩეველს სურს, იხილოს ისინი პარლამენტი. მმართველი პარტია სახელმწიფოს წარმოადგენს და ამიტომ დგამს სახელმწიფოებრივ, ლეგიტიმურ, გონივრულ ნაბიჯებს ამ დიალოგის წარმართვის სახით, თუმცა არც გადამლაშება იქნება კარგი. რევოლუციაზე საუბრით ოპოზიციას სურს, გააძლიეროს დასავლეთის ზეწოლა ხელისუფლებაზე, ეს უბრალოდ სასაცილოა. რომელ ზეწოლაზეა საუბარი, როდესაც პარალელურად სწორედ დასავლეთი მოუწოდებს ოპოზიციას პარლამენტში შესვლისკენ. მე არ ვიცი, როგორ შეიძლება ამის შემდეგ ოპოზიციის სერიოზულობაზე საუბარი. ჩემი აზრით, მათი ქმედებები დღევანდელ პოლიტიკურ რეალობაში არაადეკვატურია“, – განაცხადა თევზაძემ.