დროებითმა საგამოძიებო ჯგუფმა 2020 წლის საპარლამენტო არჩევნებისას დაშვებული დარღვევები და გადაცდომები უნდა შეისწავლოს.
საგამოძიებო კომისიის მუშაობაში ჩართვას არ აპირებენ “მოქალაქეები”, თუ პროცესში მონაწილეობაზე უარს იტყვიან სხვა ოპოზიციური პარტიები.
უმრავლესობაში “მოქალაქეების” საპასუხოდ განმარტეს, რომ მათ არ უნდა იჩქარონ მსგავსი განცხადებების გაკეთება, რადგან კომისიის საბოლოოდ დასაკომპლექტებლად ჯერ ორი კვირის ვადა არსებობს.
პარლამენტის თავმჯდომარის პირველი მოადგილის გია ვოლსკის შეფასებით, ოპოზიციური პარტიების მიერ ამ პროცესში ჩართვაზე უარის თქმა საზოგადოებაში გარკვეულ ეჭვებს ბადებს, რადგანაც მისი თქმით, ამ პარტიებს არ აქვთ შესაბამისი მტკიცებულებები იმისა, რომ არჩევნების გაყალბება საბოლოოდ დაადასტურონ.
“საგამოძიებო კომისია ითვალისწინებს მათ გამოკითხვასაც თუ საჭიროა, ვინც იყო ჩართული ამ საარჩევნო პროცესში, იმათი მონაცემების შემოწმებასაც. ასე რომ, ამ თემასთან დაკავშირებით მის ადგილას არ ვიჩქარებდი საბოლოო გადაწყვეტილების მიღებისათვის, ვინაიდან ყველა მასალა და რესურსი გააჩნია კომისიას, რომ მიიღოს ინფორმაცია, გააანალიზოს და გამოიტანოს სამართლიანი ვერდიქტი.
მე მგონია, რომ საერთოდ კომისიის შექმნის ძალიან ეშინიათ. მე არ ვიცი ვისი სიტყვები მოვიშველიო, “გირჩელებმა” თქვეს ეს, პირველმა თუ მეორემ, მაგრამ მნიშვნელობა აქვს იმას, რომ საზოგადოების დიდი ნაწილი, ოპოზიციურად განწყობილიც კი, საკმაოდ ეჭვებშია იმის გამო თუ რატომ არ შეიძლება უნდოდეს კომისიაში მონაწილეობა ოპოზიციურ კლასტერს,” – განაცხადა გია ვოლსკიმ.
შეგახსენებთ, დროებითმა საგამოძიებო ჯგუფმა 2020 წლის საპარლამენტო არჩევნებისას დაშვებული დარღვევები და გადაცდომები უნდა შეისწავლოს. საგამოძიებო კომისია პარლამენტის ბიუროს სხდომაზე უახლოეს დღეებში დარეგისტრირდება, რის შემდეგაც საკითხზე კომიტეტები იმსჯელებენ.