პროკურორ მიხეილ სადრაძის განცხადებით, ნიკა მელიასთვის აღკვეთის ღონისძიების სახით შეფარდებული გირაოს პატიმრობით შეცვლასთან დაკავშირებით ბრალდების მხარის სამართლებრივი მოთხოვნა დასაბუთებულია.
მისი თქმით, აქვთ გონივრული მოლოდინი, რომ სასამართლო პროკურატურის პოზიციას გაიზიარებს.
„გუშინ პარლამენტმა მიიღო გადაწყვეტილება და გასცა თანხმობა ნიკანორ მელიას მიმართ გამოყენებული აღკვეთის ღონისძიების, გირაოს უფრო მკაცრი ღონისძიებით – პატიმრობით შეცვლასთან დაკავშირებით სასამართლოსათვის შუამდგომლობის მიმართვაზე. შუამდგომლობა უკვე არის წარდგენილი სასამართლოში და დღეს არის ჩანიშნული სხდომა, სადაც განიხილება შუამდგომლობა, სასამართლო მოისმენს მხარეების პოზიციას და მიიღებს შესაბამის გადაწყვეტილებას. ჩვენი სამართლებრივი მოთხოვნა არის დასაბუთებული, კანონისმიერი, შესაბამისად, გვაქვს გონივრული მოლოდინი, რომ სასამართლო გაიზიარებს ჩვენს პოზიციას და დააკმაყოფილებს ჩვენს სამართლებრივ მოთხოვნას“, – განაცხადა პროკურორმა.
რაც შეეხება კონკრეტულად არგუმენტაციას, მიხეილ სადრაძის განმარტებით, ბრალდებულ ნიკა მელიას მიერ განხორციელებული ქმედებები კანონის დანაწესებს ეწინააღმდეგება.
„მის მიმართ გამოყენებული აღკვეთის ღონისძიების – გირაოს არგადახდა, ასევე გირაოს პირობების შეუსრულებლობა, ტირაჟირება იმისა, რომ არ შეასრულებს სასამართლოს გადაწყვეტილებებს, არ დაემორიჩილება კანონის მოთხოვნას, არის ფაქტობრივი მოცემულობა, რაც საზოგადოებისთვის ცნობილია. სისხლის სამართლებრივ სივრცეში, სამართლებრივად არ არსებობს სხვა ალტერნატივა გარდა იმისა, რომ გამოყენებული იქნეს პატიმრობა, რათა სისხლის სამართლებრივ სივრცეში უზრუნველყოფილი იყოს ბრალდებულის სათანადო ქცევა, მისი გამოცხადება და ხელი არ შეეშალოს მართლმსაჯულების პროცესს, მის განხორციელებას.
ჩვენ უნდა დაველოდოთ სასამართლოს გადაწყვეტილებას. პროცედურულად, სასამართლოს აქვს ალტერნატივა, გაიზიაროს ერთი ან მეორე მხარის პოზიცია და ამის შესაბამისად, როგორც ამ სისხლის სამართლის საქმეზე ასევე სხვა სხვა საქმეზე დააკმაყოფილოს ან არ დააკმაყოფილოს შუამდგომლობა. ჩვენი პოზიციაა, შეიცვალოს უფრო მკაცრი ღონისძიებით. სასამართლო გადაწყვეტილების მიღებისას შებოჭილი არის მხარეების პოზიციით, ჩვენი პოზიცია ცნობილია. რაც შეეხება დაცვის მხარის პოზიციას, საბოლოო ვერსიას მოვისმენთ სასამართლო სხდომაზე“, – განაცხადა პროკურორმა.
მისი განცხადებით, თუ სასამართლო გაიზიარებს პროკურატურის მოთხოვნას, არსებობს შესაბამისი სამსახურები, რომლებსაც დაევალებათ ამ გადაწყვეტილების აღსრულება.
„როგორც წესი, მსგავსი შინაარსის გადაწყვეტილებები დროის უმოკლეს ვადაში უნდა აღსრულდეს, კონკრეტული ვადა არაა, მაქსიმალურად მოკლე ვადაში უნდა აღსრულდეს, მით უმეტეს, იმ ფაქტობრივი მოცემულობის გათვალისწინებით, რომ ბრალდებული საქართველოში იმყოფება, თუმცა მისი პოზიციები საზოგადოებისთვის ცნობილია“, – განაცხადა მიხეილ სადრაძემ.
რაც შეეხება კითხვას, რამდენად სამართლებრივია გირაოზე გირაოს მოთხოვნა, პროკურორი პასუხობს, სამართალი ამას ითვალისწინებს.
„კანონმდებლობის ინტერპრეტაცია ამას ითვალისწინებს, მსგავსი განმარტება მომხდარა არა მხოლოდ საქართველოს საკანონმდებლო სივრცეში და მართლმსაჯულების სისტემაში მომხდარა, არამედ არაერთხელ უცხო ქვეყნის მართლმსაჯულების სისტემაშიც. აქედან გამომდინარე ამაში არაბუნებრივი არაფერია“, – განაცხადა პროკურორმა.