“ასეთი ხერხით ფიზიკურად ბრძოლა, მივარდნა, გაწევ-გამოწევა აბსოლუტურად არაა ქრისტიანული”, – ამის შესახებ თეოლოგმა, ლევან აბაშიძემ ჭყონდიდის ეპარქიაში მომხდარ დაპირისპირებაზე საუბრისას განაცხადა.
მედიაჰოლდინგ „კვირას“ პრესკლუბში გამართულ პრესკონფერენციაზე ლევან აბაშიძემ განაცხადა, რომ ეკლესიაში გარკვეულ ძალისმიერ დაპირიპირებასთან გვაქვს საქმე.
„როგორც იცით, სინოდმა მეუფე პეტრე ეპისკოპოსობიდან გადააყენა. იქ დროებითი ეპისკოპოსი იყო დანიშნული. ახლა, როდესაც დაინიშნა ეპისკოპოსი, სამღვდელოების ნაწილი არ აღაირებს სინოდის ამ გადაწყვეტილებას. მათ, ასე ვთქვათ, ცხადად გამოაცხადეს დაუმორჩილებლობა. როდესაც მღვდელი ან დიაკონი პრინციპულად არ მიდის წირვაზე, ეს ნიშნავს, რომ ის კანონს არღვევს. სავსებით ლოგიკურია და ბუნებრივია, რომ მათ დიაკვნის ხარისხი შეუჩერდათ. შემდეგ რაც მოხდა, ტელევიზიით ყველამ ვნახეთ. ხალხის ჯგუფი შეეცადა, ეპისკოპოსის რეზიდენციაში შესულიყო. რაც ვნახეთ, მათ უნდოდათ, იქ ძალით შესულიყვნენ, ისინი არავის დაუპატიჟებია იქ. ამბობენ, რომ შიგნით ფიზიკური დაპირისპრიება იყო, ეს ჩვენ არ ვიცით. რაც იქ ხდებოდა – ჩოჩქოლი, გაწევ-გამოწევა, ეს საკმაოდ სერიოზული ამბავია – საქმე ეხება ადამიანის სიცოცხლესა და ჯანმრთელობას. ამ გაუფრთხილებლობით მეორე სართულიდან 5 ადამიანი გადმოვარდა. ეს სერიოზული საფრთხეა ადამიანის სიცოცხლისთვის.
ეს ხალხი არ აღიარებს არც სინოდის, არც ეპისკოპისის გადაწყვეტილებას. ისინი მოითხოვენ, დაბრუნდეს მეუფე პეტრე. ისეთ მოთხოვნებს აყენებენ, რომელიც საეკლესიო სამართლის წესის მიხედვით გამართელებული არაა. შეიძლება, რაღაცას არ დაეთანხმო, შენი აზრი გამოთქვა, მაგრამ საბოლოო სიტყვა ეკუთვნის წმინდა სინოდს, ეპისკოპოსებს. ქრისტიანული თვალთახედვით, შენ ეკლესიის გადაწყვეტილებას უნდა დაემორჩილო. ამ შემთხვვეაში ეკლესიის გადაწყვეტილება სინოდის გადაწყვეტილებაა. თუ უსამართლოდ მიგაჩნია, მაინც უნდა დაემორჩილო. ამის მაგალითი მოუციათ წმინდა მამებს, ამის მაგალითს გვაძლევს იესო ქრისტე. ვიცით, რომ იესო ქრისტე უსამართლოდ დაიჭირეს, გაასამართლეს და დასაჯეს.
ასეთი ხერხით ფიზიკურად ბრძოლა, მოთხოვნები, მისვლა, მივარდნა, გაწევ-გამოწევა აბსოლუტურად არაა ქრისტიანული. აქ ჩვენ საქმე გვაქვს ეკლესიაში გარკვეულ ძალისმიერ დაპირისპირებასთან“, – განაცხადა ლევან აბაშიძემ.
მისივე თქმით, გასაკვირი არ იქნება, თუ ამ პროცესების უკან მეუფე პეტრე იდგეს.
„ვერავის დავადანაშულებ, მაგრამ არ იქნება გასაკვირი, თუ მეუფე პეტრე დგას ამის უკან. დიაკვანი პეტრე იმეორებდა იმას, რასაც მეუფე პეტრე ლაპარაკობს. ვფიქრობ, ისინი მეუფე პეტრეს გავლენის ქვეშ არიან. ვიცით, მეუფე პეტრე სინოდს, საპატრიარქოს დაუპირისპირდა. მას მიზანი აქვს ის, რომ თავად გამოჩნდეს მართალი და სხვა ყველა – მტყუანი. ის საუბრობს რუის- ურბნისის კრებაზე, თავად არის, ალბათ, მარტო მართალი – ეს არის მისი პოზიცია. გვახსოვს, რაც მოხდა 2019 წლის ოქტომბერში, სინოდის სხდომაზე. ყველა ეპისკოპოსი ერთხმად ამბობს, რომ მან იქ უკადრებელი იკადრა“, – განაცხადა ლევან აბაშიძემ.
ცნობისთვის, 2 დღის წინ მარტვილის (ჭყონდიდის) ეპარქიაში დაპირისპირების დროს რამდენიმე ადამიანი დაშავდა, მათ შორის, მედიის წარმომადგენლები. ეპარქიის წარმომადგენლებსა და მრევლის ნაწილს შორის დაპირისპირების მიზეზი ეპარქიაში ახლადდანიშნული მიტროპოლიტის, სტეფანეს მიერ ორი სასულიერო პირისთვის, კონსტანტინე გაბისონიასა და პეტრე ღუდუშაურისთვის მღვდელმსახურების შეჩერება გახდა. შეხლა-შემოხლის დროს, ეპარქიის მეორე სართულზე ხის მოაჯირი ჩამოინგრა, რა დროსაც რამდენიმე ადამიანი აივნიდან გადავარდა.
ეპარქიაში მომხდარ ფაქტთან დაკავშირებით შსს-მ გამოძიება დაიწყო.
„მეუფე სტეფანეს (კალაიჯიშვილი) სიტყვიერი და წერილობითი შეგონების მიუხედავად, ორმა დიაკონმა დემონასტრაციულად უარი განაცხადა მღვდელმთავართან თანამწირველობაზე, რაც არის საეკლესიო კანონიკის უხეში დარღვევა; ამიტომაც, შესაბამისი საეკლესიო სასჯელი დაედოთ. პროტესტის ნიშნად, მათ და მათთან დაკავშირებულმა სასულიერო პირთა მცირე ჯგუფმა, აგრეთვე, გარკვეულმა საერო პირებმა მღვდელმთავრის რეზიდენციის ეზოში თავი მოუყარეს მომხრეებს და უხეში ზეწოლით შეეცადნენ, ჩაეშალათ მეუფე სტეფანეს მიერ მიმდინარე პროცესებთან დაკავშირებით მოწვეული საეპარქიო კრება.
ვაცხადებთ, რომ ჭყონდიდის ეპარქიაში მომხდარი ეს შემთხვევა იყო დაგეგმილი პროვოკაცია, მიმართული ამ ეპარქიისა და, საერთოდ, საქართველოს ეკლესიის წინააღმდეგ”, – აცხადებენ საპატრიარქოში.