ალერგოლოგ-იმუნოლოგმა ბიძინა კულუმბეგოვმა განმარტა, რას უნდა მიაქციონ ყურადღება ალერგიის მქონე ადამიანებმა COVID19-ის საწინააღმდეგო ვაქცინით აცრისას.
„ტრადიციული ვაქცინებიც ხასიათდებოდნენ ალერგიული რეაქციებით. მთავარი ალერგენები ტრადიცულ ვაქცინებში, ტეტანუსი/დიფტერია/წითელა/წითურა და ა.შ. ვიცით ჩვენ კალენდალურად, ესენია ძირითადად ანტიბიოტიკები, კვერცხის კომპონენტები, ასევე არის ჟელატინი და ბევრი ასეთი ნივთიერება. მსგავსი ტიპის ნივთიერება მწარმოებლებმა ვაქცინაში არ შეიყვანეს. არც „ფაიზერმა“, არც „მოდერნამ“, არც „ასტრა ზენეკამ“ და არც „ჯონსონმა“ არ შეიყვანეს“, – აღნიშნა კულუმბეგოვმა.
მისი თქმით, ტრადიციული ვაქცინაციისას მილიონ შემთხვევაში აცრისას ვლინდებოდა ერთი ანაფილაქსიური რეაქცია. „ეს ყველაზე საშიში და რთული რეაქცია, რომელიც ძალიან სწრაფად და მწვავედ ვითარდება. შესაბამისად, ნივთიერება რომელიც არის ვაქცინებში, პოლიეთილენგლიკოლი „ფაიზერში“ და „მოდერნას“ ვაქცინაში, „ასტრაზენეკაში“ არის პოლისორბატი, არის ეჭვი, რომ ამ ნივთიერებებმა გამოიწვიოს შედარებით მეტი ალერგიული რეაქცია, ვიდრე ტრადიციული ვაქცინები იწვევდა. მილიონი ადამიანი თუ აიცრება ალერგიული რეაქცია ექნება 5 ადამიანს“, – აღნიშნა კულუმბეგოვმა.
ამასთან, კულუმბეგოვის განცხადებით, საქართველოში უკვე არსებობს კოვიდვაქცინაციის შემდგომი ალერგიული რეაქციების პროტოკოლი.
„რომელიც ჯანდაცვის სამინისტროს მიერ დაშვებულია და ჩვენ რამდენიმე ტრენინგი ჩავუტარეთ თბილისის ცენტრის და ქუთაისის ექიმებს, რომელთაც ვაქცინაცია უნდა ჩაატარონ, ამ თუ იმ შემთხვევაში როგორ იქცევიან. ამ პროტოკოლის მიხედვით, თუ ადამიანს აქვს სტანდარტული ალერგიული დაავადებები, ბრონქული ასთმა, ალერგიული რინიტი, კანის და კვებითი ალერგია, შოკოლადზე, თაფლზე და ნაკბენზე ალერგია, მიუხედავად ამისა, ამ ახალი ვაქცინის გაკეთების წინაღობა არ არსებობს. ასეთი ადამიანი 30 წუთი მოიცდის იქ, სადაც ვაქცინა გაუკეთდება. ადამინების ის კატეგორია თუ ცნობილია, რომ მათ პოლიეთილენგლიკოლსა და პოლისორბატზე აქვთ რეაქცია არ უკეთდებათ ვაქცინა და ამ ნივთიერებისაგან თავისუფალ ვაქცინას უნდა დაველოდოთ. ან თუ პირველ დოზაზე ექნებათ რეაქცია, მეორე დოზა მათ არ გაუკეთდებათ“, – აღნიშნა კულუმბეგოვმა.