8 მარტს განვითარებული მოვლენების შემდეგ, ჭყონდიდის ეპარქიაში პირველი საკვირაო წირვა ჩატარდა. წირვა ეპარქიის მიტროპოლიტმა, მეუფე სტეფანე კალაიჯიშვილმა აღავლინა.
წირვის პარალელურად, ეპარქიის ეზოში, უსაფრთხოების მიზნით, მობილიზებული იყო პოლიცია, ასევე იმყოფებოდა როგორც ადგილობრივი და სხვადასხვა ეპარქიიდან ჩამოსული მრევლი.
საკვირაო წირვის დასრულების შემდეგ მეუფემ მრევლს ქადაგებით მიმართა. მან კიდევ ერთხელ ისაუბრა 8 მარტს ეპარქიაში განვითარებულ მოვლენებზე და „მასში მონაწილე სასულიერო პირებს, მედიასა და მრევლს” სინანულისკენ მოუწოდა.
„ყველას, ვისაც განსაკუთრებით უაზრო ქმედებებში მოუწია მონაწილეობა, მათ შორის სასულიერო პირებს, მოვუწოდებ, შენდობა ითხოვონ საჯაროდ, ყველას წინაშე, იმიტომ რომ ეს მათ ძალიან დიდ ძალას მისცემს უფლისკენ მობრუნებისა, ეკლესიისგან შეწყნარებისა. მრევლი, ადამიანები და მათ შორის ჟურნალისტები, რომლებიც ამაში მონაწილეობდნენ, შენდობა ითხოვონ, ოღონდ თავიანთ მოძღვრებთან, ვინც არის მორწმუნე და ვინც არ არის მორწმუნე ახლა თვითონ თავის თავს მიხედავს. უფალი როგორ დახვდება, ეგ თვითონ იკითხოს, მაგრამ ვისაც აქვს სინდისი ქრისტიანული, მივა მოძღვართან და შენდობას ითხოვს. ჩვენ არ ვითხოვთ, რომ ერის ხალხი საჯაროდ იხდიდეს ბოდიშს. ერის ხალხმა თავის მოძღვრებთან უნდა ითხოვოს შენდობა და ყველას მიეცემა შენდობა“, – განაცხადა მიტროპოლიტმა სტეფანემ.
ქადაგების დასრულების შემდეგ, ჟურნალისტების მიერ დასმულ კითხვაზე, თუ რა გეგმები აქვს ეპარქიაში, უპასუხა, რომ ის მარხვის პერიოდს მდუმარებაში გაატარებს, ხოლო გეგმებთან დაკავშირებით ბრწყინვალე შვიდეულის შემდგომ გეგმავს პრესკონფერენციას, სადაც ყველა კითხვას გასცემს ამომწურავ პასუხს.
8 მარტს ჭყონდიდის ეპარქიაში ეპარქიის წარმომადგენლებისა და სასულიერო პირების ნაწილს შორის დაპირისპირება მოხდა. დაპირისპირების შედეგად, ჩამოინგრა მეუფის რეზიდენციის აივნის მოაჯირი, რა დროსაც დაშავდა 8 ადამიანი, მათ შორია მედიის წარმომადგენლები.
მომხდართან დაკავშირებით შინაგან საქმეთა სამინისტრო გამოძიებას სსსკ-ის 124-ე მუხლით აწარმოებს, რაც ჯანმრთელობის გაუფრთხილებლობით დაზიანებას გულისხმობს.