თენგიზ ცერცვაძემ საქართველოში ვაქცინაციის მხრივ დაბალი აქტივობის მიზეზები განმარტა. თბილისის ინფექციური საავადმყოფოს დირექტორი მიიჩნევს, რომ ეს მიზანმიმართული ანტივაქსერული კამპანიის შედეგია.
„როგორც კი შემოვიტანეთ ვაქცინა, ცალკეულმა პირებმა და ტელევიზიებმა აქტიური ანტივაქსერული კამპანია გააჩაღეს, რომ ეს არის ცუდი ვაქცინა, ქართველ ადამიანებზე მთვრობა ატარებს ექსპერიმენტებს, „არ გაიკეთოთ ეს ვაქცინა, მას აქვს უამრავი გვერდითი მოვლენა, შეიძლება გამოიწვიოს სასიკვდილო შედეგები, 13-მა ქვეყანამ შეაჩერა ამ ვაქცინის გამოყენება და საქართველომ მაშინ დაიწყო, როცა სხვებმა შეაჩერეს“ და ა.შ. ეს იყო აღვირახსნილი, საკუთარი ქვეყნის სიძულვილით გაჟღენთილი და ქვეყნის საწინააღმდეგოდ მიმართული, ყოვლად უსაფუძვლო კამპანია. სამწუხაროდ, ამ კამპანიამ იმოქმედა. ამას დაემატა ამბიციადაუკმაყოფილებელი ექიმების და ვაიექსპერტების გამონათქვამები, „არ გავიკეთებ ვაქცინას და მოგიწოდებთ, თქვენც არ გაიკეთოთ“. ამ ყველაფერმა განაპირობა ის, რომ დღეს გვაქვს დაბალი აქტივობა“, – განაცხადა ცერცვაძემ.
მისი თქმით, პარადოქსულია ის, რომ ვაქცინის შემოტანამდე პროცესის შეყოვნების გამო საყვედურები ისმოდა, ახლა კი, როცა ქვეყანაში პრეპარატი უკვე არის, მის გამოყენებას არ ჩქარობენ.
„ახლა ყველაფერი დამოკიდებულია ქართველ ხალხზე, ჯანდაცვის სისტემასა და ქვეყნის ხელმძღვანელობაზე, რამდენად მოახერხებენ საზოგადოების მობილიზებას ასაცრელად“, – დასძინა ცერცვაძემ.