საქართველო “ფაიზერის” ვაქცინას მიმდინარე კვირაში ელოდება, თუმცა იქამდე ქვეყანაში იმუნიზაციის პროცესი ნელი ტემპით მიმდინარეობს.
უნდობლობისა და უკურეაქციის მძიმე შემთხვევის გამო, ერთი კვირის განმავლობაში, აიცრა მხოლოდ 3818 პირი.
ეს იმ ფონზე, როდესაც ასტრაზენეკას პრეპარატის 43 ათასი დოზაა ქვეყანაში შემოტანილი. ჯანდაცვის სამინისტროსა და სპეციალისტების არაერთი მცდელობის მიუხედავად , რომ საზოგადოებაში ამაღლდეს ნდობა, ჯერჯერობით, სურვილი ვაქცინაციაზე გამოთქვა 5246-მა ადამიანმა.
როგორ გაგრძელდება ქვეყანაში პროცესი – ჯანდაცვის სამინისტროში, ამ წუთებში, მიმდინარეობს სამუშაო შეხვედრა. იმუნიზაციის ექსპერტთა და ვაქცინაციის საკოორდინაციო საბჭოს სხდომაზე განიხილავენ, როგორ აითვისებენ ინფექციის საწინააღმდეგო ახალ პრეპარატს მაშინ, როცა ჯანდაცვის სისტემა უკვე არსებულსაც კი ვერ იყენებს სრულად.
იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე აცხადებს, რომ პრიორიტეტული ჯგუფების განსაზღვრაში კორექტივები შევა.
“იმის გათვალისწინებით, რომ აქტივობა მაღალი არ არის, კორექტივებს შევიტანთ პრიორიტეტული ჯგუფების განსაზღვრაში,”– აღნიშნა ივანე ჩხაიძემ.