დათა ვანიშვილის ოჯახს სუს-ის ანალიტიკური დეპარტამენტის დირექტორის მოადგილემ ადგილობრივი ხელისუფლების წარმომადგენლებთან ერთად მიუსამძიმრა.
„ვუსამძიმრებთ დათა ვანიშვილის ოჯახს. დათა ვანიშვილს დღეს ქართულ მიწას მივაბარებთ. ის ოკუპაციისა და ქართველი კაცის სულის უტეხელობის სიმბოლოა. რაც შეეხება ნათესავების შეშვებას, ჩვენ გვაქვს კომუნიკაცია ცხელი ხაზის მეშვეობით, მაგრამ საბოლოო პასუხი ჯერ არ ვიცით“, – განაცხადა სუს-ის ანალიტიკური დეპარტამენტის დირექტორის მოადგილემ, ირაკლი ანთაძემ.
სუს-ის წარმომადგენლისა და ადგილობრივი ხელისუფლების წარმომადგენლების გარდა, მავთულხლართან შეიკრიბნენ გარდაცვლილის ახლობლებიც.
„დათა ვანიშვილი მამაჩემის ალალი ძმაა. ეს წლები, აქ ამოვდიოდი და შორიდან ვნახულობდი. მავთულხლართების გამო, იქით ვერ გადავდიოდი. ახლაც ამოვედით და ჯერ, ვერ მივდივართ. არ ვიცით, შეგვიშვებენ თუ არა“, – თქვა დათა ვანიშვილის ძმის შვილმა, ზვიად ვანიშვილმა.
დღეს ხურვალეთში დათა ვანიშვილს დაკრძალავენ. მან ოკუპირებულ ტერიტორიაზე მოქცეული სახლი არ მიატოვა და მეუღლესთან ერთად იქ განაგრძო ცხოვრება. დათა ვანიშვილი ოკუპაციასთან ბრძოლის სიმბოლოდ იქცა.
2014 წელს ის ოკუპანტებმა იმის გამო დააკავეს, რომ საქართველოს ცენტრალური ხელისუფლების მიერ კონტროლირებად ტერიტორიაზე პენსიის ასაღებად იყო გადმოსული. საოკუპაციო რეჟიმის აკრძალვების მიუხედავად, დათა პაპა მაინც ახერხებდა თითქმის ყველა არჩევნების დროს გადმოსვლას და საკუთარი პოზიციის დადასტურებას.
დათა ვანიშვილი 88 წლის ასაკში 19 მარტს გარდაიცვალა. მას ოკუპირებულ სასაფლაოზე დაკრძალავენ.
