ჩვენ ვართ და მომავალშიც ვიქნებით პრინციპულები კორუფციასთან ბრძოლაში, არავის მიეცემა შესაძლებლობა, რომ კანონს თავი აარიდონ და არასწორად იმოქმედონ, – ამის შესახებ დედაქალაქის მერმა კახა კალაძემ თბილისის მთავრობის სხდომაზე განაცხადა.
როგორც კახა კალაძემ აღნიშნა, გუშინ მუნიციპალური ინსპექციის სამსახურის ერთ-ერთი თანამშრომელი დააკავეს შესაბამისმა სამსახურებმა.
„ჩვენ ვიქნებით ძალიან პრინციპულები ვართ და ვიქნებით მომავალშიც პრინციპულები კორუფციასთან ბრძოლაში. არავის მიეცემა შესაძლებლობა, რომ კანონს თავი აარიდონ და არასწორად იმოქმედონ. მინდა, ჩვენი ადმინისტრაციის ხელმძღვანელს ვალერი ჭიღლაძეს მადლობა გადავუხადო იმ საქმიანობისთვის, რასაც ამ მიმართულებით ჩვენ ვაკეთებთ. სისტემა, რომელიც ჩვენი მხრიდან არის დანერგილი, შესაბამის სამსახურებთან ერთად ეფექტურად მუშაობს. შედეგი სამწუხაროა, თუმცა კიდევ ერთხელ ვიმეორებ, ჩვენ ვიქნებით უკომპრომისოები და ძალიან პრინციპულები კორუფციასთან ბრძოლაში. ეს ასე იყო ყოველთვის და მომავალშიც ასე იქნება. მოგიწოდებთ, გააფრთხილეთ თქვენი თანამშროლები, ეს არის კატეგორიული მოთხოვნა, რომ ყველა იყოს ყურადღებით და იმოქმედოს კანონის ფარგლებში“, – განაცხადა კახა კალაძემ.