ჩინურ ვაქცინას ბევრი ელოდება, ვინაიდან ის ტრადიციული მეთოდით არის დამზადებული, – ამის შესახებ ინფექციური საავადმყოფოს დირექტორმა, თენგიზ ცერცვაძემ ბრიფინგზე განაცხადა.
მისი თქმით, საქართველოში ჩინური ვაქცინა ჯერ არ შემოვა.
„ბევრი ელოდება სხვა ვაქცინებს, ადრე იყო ასეთი განწყობა, რომ ჩინური ვაქცინა არ გვინდა, ახლა ზოგი ელოდება ჩინურს, მას შემდეგ, რაც გაირკვა, რომ ჩინური ვაქცინა ტრადიციული მეთოდით არის დამზადებული და არ აქვს ის ელემენტები რაც „ასტრაზენეკას“ და „ფაიზერს“.
მინდა გითხრათ, რომ ჩინური ვაქცინა ჯერ არ შემოვა, რამდენადაც განაცხადა სამინისტრომ, გამზადებულია ხელშეკრულება, მაგრამ არ შემოვა, ვიდრე მკაცრი მარეგულირებელი, ჯანმოს ან ევროპის მედიკამენტების სააგენტო მას არ მისცემს ავტორიზაციას, რომ ის ეფექტურია და უსაფრთხო. ამის შემდეგ რომ შემოვა, ის არ გამოიწვევს ნეგატიურ გავლენებს.
ადამიანი მიეჩვია იმას, რომ საქართველო მომხმარებელს სთავაზობს არჩევანს, 2 საუკეთესო ვაქცინა სახეზეა -„ასტრაზენეკა“ და „ფაიზერი“, ჩინურიც დაემატება, რომელსაც მსოფლიოში ბევრი უკეთესად თვლის.
პოლიტიკური მოსაზრებით, რა თქმა უნდა, რუსულ ვაქცინას ხელს არ ვახლებთ, გერმანია ყიდულობს რუსულ ვაქცინას, ასე რომ ასეთი ცალსახა წინასწარი შეფასებები სწორი არ არის.
რა თქმა უნდა, მას შემდეგ, რაც ავტორიზაცია და საერთაშორისო აღიარება ექნება ჩინურ ვაქცინას ბაზარზე, ცუდი არ არის, არჩევანის საშუალება იქნება.
ვიცი, რამდენიმე ძალიან გავლენიანი და შეძლებული ადამიანი, ჩემი ნაცნობები, რომლებმაც არ ისურვეს „ასტრაზენეკა“ და „ფაიზერი“, წავიდნენ თურქეთში, აზერბაიჯანში და ჩინური ვაქცინით აიცრნენ“,- განაცხადა თენგიზ ცერცვაძემ.