ქუთაისის ცენტრში „ნამახვანჰესის“ მშენებლობის საწინააღმდეგო აქცია მიმდინარეობს. აქციის მონაწილეთა ნაწილი სოფელ გუმათიდან ქუთაისის მიმართულებით ფეხით გაემართა. ამ წუთებში ქალაქის ცენტრში ათეულობით ადამიანია შეკრებილი. ისინი ჰესის მშენებლობას ეწინააღმდეგებიან და ხელისუფლებას მოუწოდებენ, პროტესტის მასშტაბურობა გაიაზრონ.
აქციის მონაწილეების თქმით, ლოზუნგებით საზოგადოების მოტყუება შეუძლებელია, რადგან მათ კარგად აქვთ წაკითხული ხელშეკრულების პირობა და კარგად ესმით პროტესტის მნიშვნელობა. როგორც ადგილობრივები აცხადებენ, „ნამახვანჰესი“ მანამდე არ აშენდება, ვიდრე საზოგადოებაში არსებულ ყველა კითხვას პასუხი არ გაეცემა. აქციის მონაწილეების განცხადებით, ხელისუფლება მათ რადიკალურ ჯგუფებად წარმოაჩენს, თუმცა, ორგანიზატორების განცხადებით, მათი საპროტესტო აქციები მშვიდობიანია.
ამასთან, აქციის ერთ-ერთი ორგანიზატორის, ვარლამ გოლეთიანის განცხადებით, ისინი აპირებენ, რომ მთელი ღამის განმავლობაში დარჩნენ ქუთაისში.