აბსოლუტურად სხვა პრობლემები აწუხებთ მოქალაქეებს, ვიდრე ერთი პოლიტიკური პარტიის თავმჯდომარის გათავისუფლება, – ამის შესახებ ლევან იოსელიანმა „იმედის ფაქტორში“ განაცხადა.
„მოქალაქეების“ წევრისა და პარლამენტის ვიცე-სპიკერის თქმით, ის და ალეკო ელისაშვილი ერთადერთი დეპუტატები იყვნენ, რომლებმაც „ნაციონალური მოძრაობის“ თავმჯდომარისთვის, ნიკა მელიასთვის იმუნიტეტის მოხსნას მხარი არ დაუჭირეს, რადგან იცოდნენ, რომ ეს პოლიტიკური დებატების მთავარი თემა გახდებოდა, იმ პრობლემების ნაცვლად, რომელიც საზოგადოებას აწუხებს.
„პარლამენტში უნდა იყოს საუბარი ჩვენი მოქალაქეებისა და პენსიონერების სესხებზე, ვაქცინაციაზე, განათლების სისტემაში პრობლემებზე და ა.შ., რაც ყოველდღიურად მაწუხებს მე, როგორც მშობელს, გვაწუხებს ჩვენ, როგორც მოქალაქეებს. ამისთვის ვარ მე პარლამენტში, რომ ამ საკითხებზე ვილაპარაკო და არა იმაზე თუ ვინ, როდის და რა პირობებით გამოუშვებს, თუნდაც ევროკავშირის გირაოთი (მელიას). ეს არ არის ჩემი დღის წესრიგი და მე ამაზე საუბარი დავამთავრე“, – განაცხადა იოსელიანმა.