ყველა შეხვედრაზე ხაზგასმით იყო აღნიშნული, რომ მიღწეული კომპრომისი პირველ რიგში საქართველოს ხელისუფლების დიდი დამსახურებაა, ერთობლივად მიღებული გადაწყვეტილებები არის ჩვენი ქვეყნის დემოკრატიული პროცესებისთვის მნიშვნელოვანი და ამას საქართველოს პარტნიორები აღიარებენ, – ამის შესახებ გერმანიაში საქართველოს ელჩმა, ლევან იზორიამ „ქრონიკას“ განუცხადა.
მისი თქმით, გერმანიის ფედერაციულ რესპუბლიკას მაღალი რანგის დელეგაცია ეწვია: „ქართული ოცნების“ პარტიის თავმჯდომარე და კომიტეტის სამი თავმჯდომარე.
„სადოქტორო დისერტაციები ოთხივეს გერმანიაში აქვს დაცული. ეს არის უპრეცედენტო მოვლენა, როდესაც დელეგაციის ოთხივე წევრს აქვს ამ ქვეყანაში ასეთი სამეცნიერო მიღწევა და ასეთი აღიარება. ეს კიდევ ერთხელ მოწმობს გერმანიასა და საქართველოს შორის მჭიდრო ურთიერთობაზე.
ჩვენ გადავდივართ ურთიერთობის ახალ ეტაპზე, სადაც გვექნება მეტი მხარდაჭერა, როგორც ევროკავშირში, ასევე ნატოში ინტეგაციის გზაზე. ახალ რეალობაში საქმე გვაქვს მძაფრ რუსულ აგრესიასთან რეგიონში და ეს იყო ყველა შეხვედრისას განხილვის საგანი. შედგა მსჯელობა, თუ რა ფორმით ვიყოთ ერთად პრინციპულები რუსეთის აგრესიის წინააღმდეგ. საგარეო საქმეთა სამინისტროში გამართული შეხვედრის ერთ-ერთი მთავარი თემა იყო დაკავშირებადობა ევროპასთან. შედგა საუბარი, რა კომუნიკაცია უნდა იყოს მათ შორის ეკონომიკის სფეროში, რომ საქართველოდან და ევროკავშირის პერსპექტივიდან გეოსტრატეგიული ინტერესი კონკრეტულ პროექტებთან დაკავშირებული.
წელს იგეგმება აღმოსავლეთ პარტნიორობის სამიტი და სწორედ ეს დაკავშირებადობაუნდა იყოს ერთ-ერთი ცენტრალური თემა. ეს უფრო იმ კონკურენციის პირობებში, როდესაც რუსეთს არა მხოლოდ სამხედრო სტრატეგიული ამოცანები აქვს რეგიონში, არამედ ეკონომიკურ-პოლიტიკური ამოცანები. ამის საპირისპიროდ ჩვენ ყველაფერს ვაკეთებთ ევროკავშირთან ერთად, ორმხრივ ფორმატში გერმანიასთან ერთად სტრატეგიული მიზნების განსახორციელებლად. საქმე გვაქვს ახალ რეალობასთან, ახალ ამოცანებთან და გამოწვევებთან, რაც მეტ მობილიზებას, პრინციპულობას და მეტ მხარდაჭერას ითხოვს“, – განაცხადა ლევან იზორიამ.
საქართველოს საპარლამენტო დელეგაცია გერმანიაში შეხვედრებს მართავს.