„ზოგიერთმა ტელევიზიამ აბსოლუტურად განსხვავებული ვითარება დახატა… ზოგმა – შეგნებულად, ზოგმა – შეუგნებლად. ყველა საინფორმაციო გადაცემაში, რომელიც 8 მარტს იყო, „ტვ პირველის“, „მთავრი არხისა“ და სხვა ტელევიზიების ეთერში, ჩანს მიკერძოება“, – ამის შესახებ ჭყონდიდის ეპისკოპოსმა, მეუფე სტეფანემ ეპარქიაში გამართულ პრესკონფერენციაზე განაცხადა.
მისივე თქმით, სატელევიზიო მონტაჟის გამოყენებით, აღნიშნული ტელევიზიები მის „მონსტრად წარმოჩენას“ ცდილობდნენ.
„წუთების მიხედვით შემიძლია დაგანახოთ, როდის არ იცოდნენ, ჯერ რა ეთქვათ, შემდეგ გადაცემებში რაღაც კადრები ქრებოდა, ერთმანეთს ედებოდა განსხვავებული ხმა და კადრები, საბოლოო ჯამში, ამ მანიპულაციებით, საშინელ მონსტრად და დამნაშავედ გამოვყავდი. ჩემი მონსტრად გამოყვანის ტენდენცია სამომავლოდაც გაგრძელდა. ვირტუალური რეალობა არაა რეალობა, რომელსაც შენ ქმნი. როცა ჩვენ რაიმე კადრს ვდებთ, ამას ვდებთ დაუმონტაჟებლად“, – აღნიშნა მეუფე სტეფანემ.
8 მარტს, ჭყონდიდის ეპარქიაში მომხდარი დაპირისპირების დროს, ეპარქიის რეზიდენციის აივანი ჩაინგრა, რის შედეგედაც, დაშავდნენ მედიის წარმომადგენლები, მათ შორის „ფორმულას“, POSTV-ის, „ტვ პირველისა“ და „რუსთავი 2“-ის ჟურნალისტები.