ცოლთან განქორწინების შესახებ გაკეთებული განცხადების შემდეგ პირველი საჯარო გამოსვლის დროს, მაიკროსოფტის დამფუძნებლის, ბილ გეითსის თითზე საქორწინო ბეჭედი შენიშნეს. ამის შესახებ Fox News იუწყება.
19 მაისს, გეითსი აშშ სავაჭრო პალატის ვირტუალურ ფორუმზე გამოჩნდა. მან კლიმატის ცვლილებებსა და იმ გამოწვევებზე ისაუბრა, რომლებსაც ამერიკის შეერთებული შტატები უახლოეს მომავალში უნდა გაუმკლავდეს.
მიუხედავად იმისა, რომ ბილ გეითსმა და მისმა მეუღლემ მელინდამ 3 მაისს განქორწინების შესახებ განაცხადეს, მილიარდერს თითზე კვლავ საქორწინო ბეჭედი ეკეთა. ეს კი ნიშნავს, რომ ჯერ ქორწინება ჯერჯერობით, ოფიციალურად არ გაუქმებულა, თუმცა, The Independent- ის ინფორმაციით, მეუღლეები რამდენიმე წელია, ცალ- ცალკე ცხოვრობენ.
”სიეტლში, ოთხი ან ხუთი წლის წინ გავრცელდა ინფორმაცია, რომ ისინი სასახლის სხვადასხვა ფლიგელებში ცხოვრობენ”, – განუცხადა გამოცემას ბილ გეითსის ოჯახის ყოფილმა თანამშრომელმა.
სასამართლოში განცხადება განქორწინების შესახებ მელინდამ შეიტანა. ზოგიერთი წყაროს ცნობით, ცოლ-ქმარს შორის ურთიერთობა მას შემდეგ დაიძაბა, რაც ბილი პედოფილ მილიონერ ჯეფრი ეპშტეინს დაუმეგობრდა. გარდა ამისა, როგორც New York Times– მა გაარკვია, ბილ გეითსს ცოლის ღალატის და მოტყუების უამრავი მცდელობა ჰქონდა. განქორწინების გამოცხადების შემდეგ, მელინდამ რამდენიმე კომპანიიდან 3 მილიარდზე მეტის ღირებულების აქციები მიიღო.
ცნობისთვის, ჯეფრი ეპშტეინს ბრალი არასრულწლოვანი გოგონების სექსუალური ექსპლუატაციის დანაშაულებრივი ქსელის შექმნაში დასდეს და 2019 წლის 6 ივლისს, ნიუ იორკში დააკავეს. იმავე წლის აგვისტოში მან ციხის საკანში თავი მოიკლა.