“რატომ უნდა შემოვუშვა? ამ ბავშვების ცოდვაში გავეხვე?” – ამბობს სხალთელი მიტროპოლიტი სპირიდონი სახალხო დამცველის, ნინო ლომჯარიას ნინოწმინდის ბავშვთა პანსიონში შეშვებაზე.
“არასასურველი ცილისმწამებლური კამპანია აგორდა ამ ბავშვთა სახლის წინააღმდეგ, ამ ბავშვების წინააღმდეგ. ფაქტიურად, ამის ნამდვილი მიზანი არის ეკლესიის დისკრედიტაცია. გარკვეულმა არხებმა ძალიან ტენდენციურად დაიწყეს ამის გაშუქება და საშიენლ ცილისწამებაზე გადმოვიდნენ და ამიტომ ჩვენში აბსოლუტურად დაკარგეს ყოველგვარი ნდობა.
მე რატომ უნდა შემოვუშვა? თქვენ თუ თქვენს შვილებთან არ შეუშვებთ და არ გაარყვნევინებთ საკუთარ შვილებს, ეს ბავშვები მე გავზარდე აქ, ჩემი შვილები არიან, რატომ უნდა შემოვუშვა? ამ ბავშვების ცოდვაში გავეხვე? ამას სიკვდილი მირჩევნია”. – ამბობს მეუფე სპირიდონი ობიექტივთან ინტერვიუში.
2 ივნისს ნინო ლომჯარიამ თქვა, რომ ნინოწმინდის ბავშვთა პანსიონთან დაკავშირებით გამოძიება სავარაუდო გაუპატიურებაზეც არის დაწყებული. 3 ივნისს, საქართველოს საპატრიარქოს საზოგადოებასთან ურთიერთობის სამსახურმა განცხადება გაავრცელა და შსს-ს შესაბამის სამსახურს მიმართა, ბავშვთა სახლთან დაკავშირებული საქმეები გაესაჯაროებინა.
მოგვიანებით, შინაგან საქმეთა სამინისტრომ გაავრცელა განცხადება, რომ ნინოწმინდის პანსიონის საქმეში დანაშაულის დასადგენად საკმარისი მტკიცებულებები არ არის. განცხადების თანახმად, 2016 წლიდან დღემდე გამოძიება სისხლის სამართლის 4 საქმეზე მიმდინარეობს, თუმცა, ამ ეტაპზე, საქმეში არ არის საკმარის მტკიცებულებათა ის სტანდარტი, რომლითაც დადგინდება შესაძლო დანაშაულის ჩადენის ფაქტი.