ევროპული საბჭოს პრეზიდენტმა, შარლ მიშელმა რუსეთის პრეზიდენტთან, ვლადიმერ პუტინთან სატელეფონო საუბარი გამართა. ინფორმაციას ამის შესახებ ევროკავშირის საბჭო ავრცელებს.
„ევროკავშირისა და რუსეთის ურთიერთობებში დაღმავალი ტენდენცია მხოლოდ იმ შემთხვევაში შეიძლება შეიცვალოს, თუ რუსეთი მავნებლურ ქმედებებს შეწყვეტს“, – განაცხადა ევროპული საბჭოს პრეზიდენტმა.
სატელეფონო საუბრის დროს ევროპული საბჭოს პრეზიდენტმა კიდევ ერთხელ დაადასტურა ევროკავშირის ურყევი მხარდაჭერა უკრაინის დამოუკიდებლობის, სუვერენიტეტსა და ტერიტორიულ მთლიანობის მიმართ მის საერთაშორისოდ აღიარებულ საზღვრებში და ხაზი გაუსვა რუსეთის პასუხისმგებლობას მინსკის შეთანხმებების სრულად შესრულებაზე.
მხარეებმა ასევე განიხილეს ბელარუსში შექმნილი ვითარება. ევროპული საბჭოს პრეზიდენტმა კიდევ ერთხელ დაადასტურა ევროკავშირის შეფასება ბელარუსის ხელისუფლების მიერ Ryanair-ის რეისის იძულებით დაშვებასთან დაკავშირებით.
შარლ მიშელმა ხაზი გაუსვა იმას, რომ ბელარუსის ხელისუფლებამ აუცილებლად უნდა გაათავისუფლოს პოლიტიკური პატიმრები, შეწყვიტოს რეპრესიები და ძალადობა და ინკლუზიური ეროვნული დიალოგი გამართოს. მისი თქმით, რუსეთს შეუძლია მნიშვნელოვანი როლი შეასრულოს კრიზისის მშვიდობიანი გზით მოგვარებაში.
მხარეებმა ასევე ისაუბრეს ლიბიის, სომხეთ-აზერბაიჯანის კონფლიქტის, ასევე COVID პანდემიის, ვაქცინებისა და სხვა გლობალური თემების შესახებ.