ამერიკის შეერთებული შტატებისა და რუსეთის პრეზიდენტები ერთმანეთს ჟენევაში, ცნობილ ლა გრანჯის ვილაში შეხვდებიან. ინფორმაციას შვეიცარიის საგარეო საქმეთა სამინისტრო ავრცელებს.
საგარეო საქმეთა სამინისტრო მადლობას უხდის ამერიკას და რუსეთს, რადგან ჯო ბაიდენისა და ვლადიმერ პუტინის შეხვედრის ადგილად სწორედ შვეიცარია აირჩიეს.
ვილა ჟენევის ტბის მარცხენა სანაპიროზე მდებარეობს და ის მეთვრამეტე საუკუნეშია აგებული. უკვე რამდენიმე დღეა, შვეიცარიის პოლიციამ პარკი დახურა და ადგილზე უსაფრთხოების ზომების გამკაცრება დაიწყო.
ამერიკისა და რუსეთის პრეზიდენტები ერთმანეთს 16 ივნისს ხვდებიან. ჯო ბაიდენი ვლადიმერ პუტინს პრეზიდენტის რანგში პირველად ხვდება. მანამდე პუტინი და ბაიდენი ერთმანეთს 2011 წელს მოსკოვში შეხვდნენ, მაშინ ვლადიმერ პუტინი რუსეთის პრემიერ-მინისტრის პოსტს იკავებდა, ჯო ბაიდენი კი ამერიკის შეერთებული შტატების ვიცე პრეზიდენტი იყო.