დანიელმა ფეხბურთელმა კრისტიან ერიქსენმა, რომელიც, ევროპის ჩემპიონატზე, ფინეთთან მატჩის დროს, ცუდად გახდა, ინციდენტის შემდეგ პირველი პოსტი გამოაქვეყნა.
„დიდი მადლობა თქვენი თბილი და საოცარი მოკითხვებისთვის, რომელთაც მთელი მსოფლიოდან მიგზავნით. ეს ძალიან ბევრს ნიშნავს ჩემთვის და ჩემი ოჯახისთვის. კარგად ვარ – ამ ვითარების გათვალისწინებით. რამდენიმე გამოკვლევა უნდა ჩავიტარო საავადმყოფოში, მაგრამ თავს კარგად ვგრძნობ“, – წერს ფეხბურთელი.
„ევრო 2020“-ის რიგით მე-3 მატჩში დანია ფინეთს მასპინძლობდა, როცა პირველი ტაიმის მიწურულს გაურკვეველი ინციდენტი მოხდა და დანიის ფეხბურთელი კრისტიან ერიქსენი მიწაზე დაეცა. ის, ამ დრომდე, ექიმების მეთვალყურეობის ქვეშ რჩება.
სპორტსმენის შეუძლოდ გახდომის შემდეგ, მოწინააღმდეგე ნაკრების, ფინეთის გულშემატკივრები ისევე სკანდირებდნენ კრისტიან ერიქსენის სახელსა და გვარს, როგორც – დანიელები.