ჟურნალისტებმა მთავრობის ადმინისტრაციაში ჯანდაცვის მინისტრის მოადგილის, თამარ გაბუნიას ბრიფინგის დაწყებამდე „ტვ პირველის“ ოპერატორის, ლექსო ლაშქარავას გარდაცვალება დემონსტრაციულად გაპროტესტეს.
ტელეკომპანია „ფორმულას“ ჟურნალისტმა გაბუნიას ბრიფინგი დასაწყისშივე გააწყვეტინა და განაცხადა, რომ არავის აქვს მორალური უფლება, დღეს ამ ტრიბუნასთან იდგეს. მან კოლეგებს მოუწოდა მის პროტესტს შეურთდნენ. ამასთან, „ფორმულას“ ჟურნალისტის თქმით, პრემიერ-მინისტრი, ირაკლი ღარიბაშვილი უნდა გადადგეს და დამნაშავეები დაისაჯონ.
„ტვ პირველის“ ოპერატორს, ლექსო ლაშქარავას დღეს დაკრძალავენ. გამოსვენება იოსელიანის ქუჩა 37-დან, 15:00 საათზე იქნება.
ლექსო ლაშქარავა 11 ივლისს გარდაიცვალა. ის გარდაცვლილი საკუთარმა დედამ საწოლში ნახა. 5 ივლისს, ოპერატორს „თბილისი პარაიდის“ მოწინააღმდეგეები, რადიკალურად განწყობილი ჯგუფები სასტიკად მაშინ გაუსწორდნენ, როდესაც ის პროფესიულ მოვალეობას ასრულებდა.