უცხო ქვეყნის ტურისტთა დაახლოებით 15-კაციანი ჯგუფი დაბა სტეფანწმინდაში, სოფელ ჯუთადან აბუდელაურის ტბის მიმართულებით მიდიოდა, რად დროსაც, ერთ-ერთი ტურისტი ფერდობიდან დაგორდა და მდინარეში ჩავარდა, რის გამოც სამაშველო ჯგუფის დახმარება ითხოვეს.
„შეტყობინების მიღებისთანავე, მითითებულ ლოკაციაზე საგანგებო სიტუაციების მართვის სამსახურის მეხანძრე-მაშველები გავიდნენ. ადგილზე მისული მორეაგირე ჯგუფის ინფორმაციით, დაახლოებით 120 მეტრი სიმაღლიდან ფერდობზე დაგორებულ ტურისტს სხეულის სხვადასხვა სახის დაზიანება აღენიშნებოდა“, – აღნიშნულია საგანგებო სიტუაციების მართვის სამსახურის განცხადებაში.
სამაშველო ჯგუფმა კონტაქტურ მდგომარეობაში მყოფი დაშავებული ტურისტი, ხეობიდან ამოიყვანა და საკაცით, დაახლოებით 5 კილომეტრის მანძილის გავლის შემდეგ, საავტომობილო გზამდე ჩაიყვანა, საიდანაც სასწრაფო-სამედიცინო სამსახურმა ის სამედიცინო დაწესებულებაში გადაიყვანა.
დაშავებულის სიცოცხლესა და ჯანმრთელობას საფრთხე არ ემუქრება.