ტელეკომპანია “ფორმულას” პოლიტიკური თოქ შოუს ხელმძღვანელი გიორგი თარგამაძე, ჟურნალისტ ვახო სანაიას საქმეზე სასამართლოს მიერ მიღებულ გადაწყვეტილებას Facebook -ზე ეხმაურება და აცხადებს, რომ ამ საქმეს სამი კონტექსტი აქვს:
“1. პოლიტიკური: ,,კუდიანებზე ნადირობის” ოცნებისეული პოლიტიკის მთავარი ხელისშემშლელიც და ამავდროულად სამიზნე – მედია – მუდმივი ტერორის ქვეშ უნდა იყოს;
2. სამართლებლივი – 3 თავდამსხმელი დამნაშავედ გამოცხადდა და ,,მოგუნდავე ბავშვების” მითის ლეგალიზებას თვით ეს სისტემაც კი მოერიდა, თუმცა სასჯელი უფრო მკაცრი უნდა ყოფილიყო. თუნდაც საქმის პრეცედენტულობის და თავდასხმების ტალღის გათვალისწინებით, რომელიც სასამართლო განხილვების ფონზე უპრეცედენტო მასშტაბის ძალადობრივი ესკალაციით ხასიათდებოდა;
და 3. მორალური: ტრადიციული ღირებულებების ფარით ( უფრო ხშირად ნაჯახით) შეიარაღებული ფიგურების და ჯგუფების სრული მორალური გაკოტრება, როცა კაცს გასაჭირში თავს ესხმიან და უსწორდებიან მეუღლის და მცირეწლოვანი შვილის თანდასწრებით. რაც მთავარია ამ უტყუარი და თვით ასეთ სასამართლოზე დადასტურებული ფაქტის გათვალისწინებით – არანაირი სინანული, პირიქით მოძალადეების საქციელის გამართლების უტიფარი მცდელობები.
ვახოს, ჩვენი – ანუ ჟურნალისტების და ზოგადად მედიის და მოქმედი ხელისუფლების დამოკიდებულება გარკვეულია. მათ შორის სასამართლოს დამოუკიდებლობის ნაწილში. ახლა საქმე საზოგადოებაზეა – როგორი იქნება მისი ვერდიქტი”, – წერს გიორგი თარგამაძე.
შეგახსენებთ, ჟურნალისტ ვახო სანაიაზე თავდასხმაში ბრალდებულებს სასამართლომ 6 თვიანი პატიმრობა მიუსაჯა. ამ ვადის ამოწურვის გამო, ისინი საპატიმროს დღესვე დატოვებენ.
ცნობისთვის, ვახო სანაიასა და მის ოჯახს თავს 25 თებერვალს, გამთენიისას დაესხნენ. როგორც ტელეწამყვანი ყვება, თავდასხმა მის ჟურნალისტურ საქმიანობას უკავშირდება. სანაიამ თავდასხმის შედეგად სხვადასხვა სახის დაზიანება მიიღო, დაშავდა მისი რძალიც. დაზარალებულად 26 თებერვალს ცნეს.
შსს-მ ჯგუფურად ძალადობის ბრალდებით 3 ადამიანი – ვაჟა გიგაური, გიორგი სახელაშვილი და სულიკო საყევარაშვილი დააკავა. მათ ბრალად პროფესიული საქმიანობის გამო განხორციელებული დევნა და დისკრიმინაციის ნიშნით შეუწყნარებლობის მოტივით მუქარა ედებათ.