“ქართული ოცნება-დემოკრატიული საქართველოს” გენერალური მდივნის, დედაქალაქის მერის, კახა კალაძის განცხადებით, მმართველ გუნდს 19 აპრილის შეთანხმება არ დაურღვევია და ყველა რეფორმა ტარდება იმისთვის, რომ საქართველო ევროკავშირის წევრი ქვეყანა გახდეს.
კითხვაზე: რატომ თქვა უარი მმართველმა გუნდმა ევროკავშირის დახმარებაზე და როგორ შეაფასებს ევროკავშირის მაკროფინანსურ დახმარებასთან დაკავშირებით ირაკლი კობახიძის და ირაკლი ღარიბაშვილის განცხადებებს, კალაძე აღნიშნავს, რომ არ აქვს ინფორმაცია მათი განცხადებების შესახებ, დახმარებებს რაც შეეხება აღნიშნავს, რომ “მათ არაფერზე არ უთქვამთ უარი”.
“რეფორმებს რაც შეეხება, ვიცი, რომ ყველა რეფორმა ტარდება იმისთვის, რომ ევროკავშირის წევრი ქვეყანა გავხდეთ. 19 აპრილზე “ოცნებას” არ დაურღვევია, სხვა პარტიებმა დაარღვიეს. “ქართულ ოცნებას“ პირობა არ დაურღვევია. ეზრუნათ იმ ადამიანებს, ვინც ამ განცხადებებს აკეთებს, რომ მოეწერა ხელი ყველაზე დიდ ოპოზიციურ პარტიას, “ნაციონალურ მოძრაობას”, – აღნიშნავს კალაძე.
კითხვაზე: ოპოზიციას აკისრებს პასუხისმგებლობას, იმ შემთხვებაში, თუ დაიკარგება ევროკავშირის დახმარება? – კალაძე აღნიშნავს: „რა თქმა უნდა, თუ შეთანხმებაზეა მიბმული პირდაპირ ეკისრება პასუხისმგებლობა ოპოზიციას”.
შეგახსენებთ, რომ გუშინ „პალიტრანიუსის“ ეთერში, გადაცემა „დღის ნიუსრუმში“ „ქართული ოცნების“ თავმჯდომარე ირაკლი კობახიძემ განაცხადა, რომ ევროკავშირისგან მაკროფინანსური დახმარების მიღებას ფინანსური დატვირთვა აღარ აქვს, რადგან ეკონომიკური ზრდის შედეგად ბიუჯეტში დამატებით 1 მლრდ ლარის აკუმულირება მოხდა. დღეს კი პრემიერ-მინისტრმა განაცხადა, რომ საქართველო ამ დახმარებაზე უარს იტყვის, რადგან წელს საგარეო ვალის შემცირება უნდა დაიწყონ.