„ერთად გავუმკლავდეთ!“ – ამ მოწოდების გარშემო გაერთიანდნენ პანდემიასთან ომის წინა ხაზზე მებრძოლი ადამიანები, რომელთაც ჯანმრთელობის ეროვნული სააგენტო წარმოგიდგენთ.
„კოვიდთან მებრძოლები“ და მათი მონათხრობი – ესაა ნამდვილი ისტორიები, რომლებიც უხილავ მტერთან ბრძოლისა და თავდადების ამბავს ასახავს.
ჯანმრთელობის ეროვნული სააგენტოს პროექტი – „ერთად გავუმკლავდეთ“ კოვიდვაქცინაციის პოპულარიზაციასა და სამედიცინო პერსონალის მხარდაჭერას ემსახურება.
ექიმი ქეთევენ ზედალაშვილი:
„პროფესიით ექიმი გახლავართ, მყავს მეუღლე და ორი შვილი. კოვიდსასტუმროში ვიმყოფები, თავს ცუდად ვგრძნობ, მაგრამ ექიმი ყველგან ექიმია – სახლში, კლინიკაში, სამზარეულოსა თუ კინოთეატრში. სუსტად ვარ, მაგრამ ტელეფონი არ ჩერდება, ვპასუხობ და ვცდილობ დახმარებას, პერიოდულად, ჩემები მახსენდებიან, შორიდან ვკითხულობ და დეტალურად ვარკვევ მათ მდგომარეობას… ოჯახი ის ტრამპლინია, რომელიც თუ მყარი და საიმედოა, მაშინ ნებისმიერი გამოწვევისთვის მზად ხარ… თუმცა, ჩემი ფიქრი სულ საავადმყოფოს, ჩემი პაციენტების ირგვლივ ტრიალებს…
ვგონებ, ექიმების პროფესიონალიზმზე არანაკლები ძალა, ადამიანების მხრიდან, ერთმანეთის მიმართ გამოვლენილ თანაგრძნობასა და სიყვარულს აქვს… ცხადად ვიხსენებ ერთ განსაკუთრებულ შემთხვევას, აი, სულ ბოლოს, მამა-შვილი რომ მოიყვანეს კლინიკაში. თავდაპირველად, ორივეს საშუალოდ მძიმე მდგომარეობა ჰქონდა. ისე უვლიდა შვილი მშობელს, ადამიანი, მათი შემხედვარე, ავად ყოფნას ინატრებდა. მამა დამძიმდა – ვერაგი, უხილავი სენი სხეულს სულს აცლიდა… მოხუცს, ინტენსიურ განყოფილებაში, განსაკუთრებული მეთვალყურეობა სჭირდებოდა. შვილმა ძალიან მთხოვა, პაციენტი თერაპიულ პალატაში დაგვეტოვებინა და მომვლელის ფუნქცია თავად შეესრულებინა – უარი ვერ ვუთხარი. ასე დაიწყო უთანასწორო ბრძოლა სიკვდილთან, ის ხნიერი იყო, თუმცა მამებს ხომ ასაკი არა აქვთ…
ეს ორი კაცი, როგორც ორი დონ კიხოტი, მხარდამხარ იბრძოდა… დღესაც მჯერა რომ მამა მე კი არა, შვილის სიყვარულმა იხსნა, კლინიკა ერთად დატოვეს. ასეთი გამარჯვებები ძალას მაძლევს! ვეთიშები ფიქრებს, ვიღებ ტელეფონს და ვურეკავ ჩემს საყრდენს, ჩემს მეუღლეს, მპასუხობს, – „ნუ გეშინია, ჩვენ ამას გავუძლებთ! თავს გაუფრთხილდი!“ – ჩემი მეუღლე პოლიციელია. ეს ჩვენი ცხოვრებაა, ცხოვრება, რომელიც ჩვენვე ავირჩიეთ, პროფესია, რომელიც ოჯახივით გვიყვარს… რაც მთავარია, აიცერით, ერთად დავამარცხოთ პანდემია, ერთად გავუმკლავდეთ!“.