გოგელიას კლინიკას, რომელსაც მოქალაქეები თაღლითობაში ადანაშაულებენ, აცრების ჩატარების უფლება არ ჰქონდა. ამის შესახებ სამედიცინო და ფარმაცევტული საქმიანობის რეგულირების სააგენტოს დირექტორმა, ზაალ კაპანაძემ ჟურნალისტებს განუცხადა. მისივე თქმით, ექიმს, რომელმაც ვაქცინაცია ჩაატარა, ამის უფლება არ ჰქონდა. ის ასევე მხილებულია ყალბი სერტიფიკატების დამზადებაში და შარშან პროკურატურამ მის წინააღმდეგ სისხლის სამართლის საქმე აღძრა.
„კლინიკას იმუნიზაციის ჩატარების უფლება არ ჰქონდა, რადგან მაღალი რისკის შემცველი საქმიანობის რეესტრში, აღნიშნულ მისამართზე აღნიშნული საიდენტიფიკაციო კოდით, დარეგისტრირებული არ არის. რაც შეეხება ექიმს, 2020 წელს სააგენტომ გამოავლინა, რომ აღნიშნული პირი ეწეოდა უკანონო საექიმო საქმიანობას და საქმიანობდა გაყალბებული სერტიფიკატებით, აღნიშნული პირის მიმართ შედგა ადმინისტრაციულ სამართალდარღვევათა ოქმი და ასევე, საქმე გადაეცა პროკურატურას. ჩვენი თანამშრომლები ადგილზე იმყოფებიან, სწავლობენ საკითხს. სანქცია დაეკისრება როგორც ექიმს, ასევე იმ სამედიცინო დაწესებულებას, სადაც ის უკანონო საექიმო საქმიანობას ეწეოდა“, – განაცხადა კაპანაძემ.
35-მდე მოქალაქე გოგელიას კლინიკას თაღლითობაში ადანაშაულებს. მოქალაქეები აცხადებენ, რომ თბილისში, ჯავახიშვილის ქუჩაზე მდებარე გოგელიას კლინიკაში, გრიპის ვაქცინის ნაცვლად, გაურკვეველი პრეპარატი გაუკეთეს.