ლევან რატიანმა „იმედის დღეში“ ვაქცინების სარგებელზე ისაუბრა. პირველი საუნივერსიტეტო კლინიკის დირექტორმა აღნიშნა, რომ აცრა არ ნიშნავს იმას, რომ ადამიანს კორონავირუსი არ დაემართება – ვაქცინაცია იმის საწინდარია, რომ ინფიცირების შემთხვევაში პაციენტის რეანიმაციაში მოხვედრისა და გარდაცვალების რისკი მნიშვნელოვნად მცირდება.
„ვაქცინაცია არ ნიშნავს ინფექციის არმიღებას. ვაქცინირებული ადამიანი შეიძლება დაინფიცირდეს, ჩვეულებრივად იყოს ინფექციის გადამტანი, მაგრამ ყველაზე მთავარი, რაც ვაქცინის სიკეთეა, ეს არის, რომ ვაქცინირებული პაციენტების 95%-ს ინტენსიური რეანიმაციული მეთვალყურეობა არ სჭირდება. ძალიან ბევრი ვაქცინირებული ინფიცირებული გამიტარებია, მაგრამ რაც მინახავს, ვაქცინირებულებში ფილტვის ქსოვილი შედარებით ნაკლებად ზიანდება და გამოჯანმრთელება უფრო მოკლე დროში დგება. სწორედ ეს არის ვაქცინის სასიკეთო ეფექტი“, – განაცხადა რატიანმა.