სახალხო დამცველი ნინო ლომჯარია აცხადებს, რომ მიხეილ სააკაშვილს მასთან საუბარში არ დაუდასტურებია, რომ რაიმე სახის დაზიანება აქვს.
ლომჯარიამ გლდანის ციხის სამკურნალო დაწესებულებიდან გამოსვლის შემდეგ განაცხადა, რომ სააკაშვილს ვიზუალურად დაზიანებები არ აღენიშნება.
„ჩემთვის არ დაუდასტურებია, რომ აქვს და ეტყობა სხეულზე დაზიანებები, თუმცა კიდევ ერთხელ, ექიმს ის არ გაუსინჯავს და რაც შემეძლო რომ დამენახა, ვიზუალურად არ ეტყობა დაზიანებები. დაზიანებებზე არ საუბრობს და არც ვიზუალურად ეტყობა, კიდევ ერთხელ, ალბათ ჯობია, რომ ექიმმა დაათვალიეროს და ამის შესახებ ოქმი შედგეს. ის მთელი დღის განმავლობაში უარს აცხადებდა სამედიცინო მომსახურების მიღებაზე, მედიკამენტების მიღებაზე და რა თქმა უნდა კვებაზეც. „კატეს“ აპარატი დგას ჯერჯერობით დერეფანში და აცხადებენ, რომ ის დამონტაჟდება. ამბობენ, რომ მალე უნდა დამონტაჟდეს. „ემერტეს“ აპარატი არ დგას. პატიმრების შეძახილები ნამდვილად არის, დავადასტურებ. გარეთ ნამდვილად ისმის. როგორც მიხეილ სააკაშვილი აცხადებს, ასევე ესმოდა პალატაშიც, თუმცა მე როცა იქ ვიყავი, ტელევიზორიც იყო ჩართული და არ მესმოდა, მაგრამ ნამდვილად, შესვლის დროსაც და გამოსვლის დროსაც ეს ხმაური დავაფიქსირე. მისი განცხადებით, საკუთარი ნების საწინააღმდეგო მოიყვანეს ამ კლინიკაში. მან იცოდა, რომ მიდიოდა სამოქალაქო კლინიკაში და ასევე ამბობს, რომ ძალის გამოყენებით შეიყვანეს უშუალოდ მე-18 დაწესებულებაში. ახლა რა მოხდა ზუსტად და როგორ მოხდა, ამას ალბათ გამოძიება და სახელმწიფო ინსპექტორის სამსახური დაადგენს. რაც შეეხება სამედიცინო დაწესებულებას, ადგილზე არიან, მორიგეობენ რეანიმატოლოგები, გავესაუბრე მათ, მთავარ ექიმსაც. დავათვალიერე საოპერაციო, თუ ინტენსიური თერაპიის განყოფილება, რაც არსებობს. მე არ ვარ ბუნებრივია ექიმი და ზუსტად ვერ მოგახსენებთ, მაგრამ ადგილზე არის გარკვეული აპარატურა. ამ დროის მდგომარეობით, კონსილიუმის მიერ გაცემული რეკომენდაციებიდან, ადგილზე არ არის „ემერტეს“ აპარატი და არ არის კათეტერიზაციის აპარატი“, – განაცხადა ლომჯარიამ.
ამასთან, ნინო ლომჯარიას თქმით, სააკაშვილის პალატა ცალკეა განთავსებული, შეხვედრების ოთახამდე გასავლელი გზა ისეა მოწყობილი, რომ არ მოუწიოს სხვა საკნებთან გავლა ან სხვა პატიმრებთან კონტაქტში ყოფნა.