“შიმშილობა არ არის მარხვა, მარხვა სულ სხვა რამეა”, – ამის შესახებ ქუთათელ-გაენათელმა მიტროპოლიტმა, მეუფემ იოანე გამრეკელმა ჟურნალისტებს მიხეილ სააკაშვილის ზიარებასთან დაკავშირებით განუცხადა.
მიტროპოლიტის თქმით, მეუფე ნიკოლოზი ალბათ არ იყო ინფორმირებული, რომ სააკაშვილმა კუჭის ოპერცია გაიკეთა და იკვებებოდა რეჟიმით, როცა ის აზიარა.
„შიმშილობა არ არის მარხვა, მარხვა სულ სხვა რამეა, ეს ერთი. მეორეც ერთი, ვიცით, რომ შიმშილობას ადგილი არ ჰქონია, გადატანილი ოპერაციის შემდეგ დამზოგავ რეჟიმში ჰქონდა კვება, ეს არც მარხვაა და არც შიმშილობა, ეს მისი ჯანმრთელობისთვის იყო განკუთვნილი. ცნობილია უკვე საექიმო დასკვნები, კუჭის ოპერაცია გაიკეთა და არ შეუძლია საკვების დიდი რაოდენობით მიღება.
ოპერაცია გაიკეთა დასავლეთში, ამიტომ დასავლეთმა იცის ეს და ეთანხმება რომ ეს არ იყო არც შიმშილი… მეუფე ეტყობა ინფორმირებული არ იყო, ეს მისი კერძო აზრი იყო, რადგან მან ახსენა, რომ პატრიარქის კურთხევით აკეთებს ყველაფერს, ამიტომ საპატრიარქო უნდა გამოხმაურებოდა, რომ ეს სიტყვები პატრიარქის კურთხევით არ იყო ნათქვამი“, – განაცხადა მეუფე იოანემ.
ცნობისთვის, საქართველოს ყოფილი პრეზიდენტი ციხეში ახალქალაქისა და კუმურდოს მიტროპოლიტმა მეუფე ნიკოლოზმა აზიარა. როგორც მან აღნიშნა, 40-დღიანი მშრალი მარხვით სააკაშვილმა ძალიან დიდი ღვაწლი გასწია. ამასთან, მან განმარტა, რომ შესაბამისი ლოცვა-კურთხევა პატრიარქმა გასცა.