როდესაც ადამიანი 44 დღის განმავლობაში შიმშილობს, თუკი მისი სახელი და გვარი არ იქნებოდა მიხეილ სააკაშვილი, რა თქმა უნდა, ის გადაყვანილი იქნებოდა შესაბამის კლინიკაში, – ამის შესახებ ფრაქციის „ერთიანი ნაციონალური მოძრაობა“ – გაერთიანებული ოპოზიცია „ძალა ერთობაშია“ წევრმა, ნატო ჩხეიძემ საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“ სტუმრობისას განაცხადა.
„რადგან მისი სახელი და გვარი არის ის, რომელიც გარკვეული მიზეზების გამო ხელისუფლებისთვის მიუღებელია, ხელისუფლება ამიტომ ამბობს, მეტი არ სჭირდებაო“, – განაცხადა ჩხეიძემ.
მისი თქმით, ხელისუფლება კანონის მიღმაა გასული.
„მას როგორც სურს, რომ წარმოაჩინოს, თავისი ნების მიხედვით ამბობს, ეს არის კანონიო. ამას საზოგადოება ხედავს და რომ ხედავს, მერე ყველა ადამიანი თავისთვის შესაბამის კანონს იქმნის და აი, აქედან იწყება ის ძალიან ცუდი ვითარება, რომელიც შეიძლება, ქაოსში გადაიზარდოს. ამაზე პასუხისმგებელი არის მხოლოდ და მხოლოდ ხელისუფლება“, – განაცხადა ჩხეიძემ.
გადაცემის წამყვანის შეკითხვაზე, რა აძლევს ამ განცხადების გაკეთების საფუძველს, რომ ირინა ენუქიძე ცოცხალი რომ ყოფილიყო, აუცილებლად შეიწყალებდა მიხეილ სააკაშვილს, რასაც საზოგადოების ნაწილის მხრიდან საკმაოდ მწვავე რეაქცია მოჰყვა და ეკუთვნის თუ არა ყოფილ პრეზიდენტს პასუხისმგებლობა გირგვლიანის საქმეზე, ნატო ჩხეიძემ განაცხადა, რომ თუ ყოფილ პრეზიდენტს გირგვლიანის საქმეზე პასუხისმგებლობა ეკუთვნის, ამას „ქართული ოცნების“ ხელისუფლება გააკეთებდა და გირგვლიანის საქმეზე ძირითადი ბრალდებული იქნებოდა მიხეილ სააკაშვილი, მაგრამ ეს ასე არ არის.