83 გარდაცვლილი, 5204 ახალი შემთხვევა და 4785 გამოჯანრმთელებული – ასეთია ბოლო 24 საათის კოვიდსტატისტიკა ქვეყანაში. სამედიცინო სფეროს წარმომადგენლები საველე ჰოსპიტლის საჭიროებაზე ისევ ალაპარაკდნენ. მედიკოსები საგანგაშო პროგნოზებს აკეთებენ. ამ წუთებში საკოორდინაციო საბჭოს სხდომა იმართება.
იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძის განმარტებით, პანდემიასა და მძიმე ეპიდსიტუაციაზე კონტროლის დასამყარებლად საჭიროა დღეში 30 ათასამდე ადამიანი იცრებოდეს.
“თუ ჩვენ გვინდა მართლა რეალურ შედეგზე ვისაუბროთ, რომელმაც შეიძლება გავლენა მოახდინოს ქვეყანაში პანდემიის კონტროლზე, 21-28-30 ათასი ადამიანია საჭირო იმისათვის, რომ ჩვენ მოვახერხოთ და დეკემბერ-იანვრისთვის უფრო მომზადებული შევხვდეთ ზამთრის პერიოდს. მომზადებაში ვგულისხმობ მოსახლეობის იმ პროცენტულ რაოდენობას, რომელსაც ჩატარებული აქვს ორჯერადი ვაქცინაცია კორონავირუსის წინააღმდეგ.
ეს მაჩვენებელი რომ 50%-ს გადასცდეს, მაშინ გარკვეულად კიდევ იმედი გვექნება, რომ არ იქნება საქართველოში ყოველდღიურად 4-5 ათასი ინფიცირებული და 70-80 გარდაცვლილი.
რამდენად ოპტიმისტურია მოლოდინი, ვნახავთ ამ კვირის განმავლობაში. თუ ისევ დავრჩით 7-10 ათასის ფარგლებში, მაშინ უნდა ჩავთვალოთ, რომ ამ ღონისძიებებმაც შედეგი არ მოგვცა, ეს იქნება ყველა ცუდი,” – აცხადებს ივანე ჩხაიძე.