“ნაცმოძრაობა” ორკესტრირებულად იწყებს ქმედებებს, რომელიც არ ჯდება არაფერში და, მით უფრო, არ ჯდება იმ კონტექსტში, რაც პრეზიდენტის მიერ არის დაანონსებული. სრულიად მიუღებელია ის ულტიმატუმი, რომელსაც უყენებენ არა მმართველ ძალას, არამედ – საზოგადოებასა და ქვეყანას და მათი კარვებში წამოწოლაც სრულიად გაუგებარია”, – ამის შესახებ საპარლამენტო უმრავლესობის წევრმა, ალუდა ღუდუშაურმა “ნაციონალური მოძრაობის” მასობრივი შიმშილობის აქციასთან დაკავშირებით განაცხადა.
“ის, რაც წამოწყებული აქვს პრეზიდენტს, წარმოუდგენლად რთული ამოცანაა, მით უმეტეს, საქმე ეხება “ნაციონალურ მოძრაობას” და ყოველგვარი საღი აზრისგან გასულ ცხელ თავებს, რომლებიც დესტრუქციულ ნაბიჯებს და ობსტრუქციულ ქმედებებს გეგმავენ.
დღეს ვხედავთ, მათი ბელადი მიხეილ სააკაშვილი მოუწოდებს ნებისმიერ ფასად გამოიყვანონ ციხიდან, ამაზე ცხადი რა უნდა იყოს – “კაგებეშნიკი” მისი ბიძა ჩამოვიდა, თითი დაუქნია, ინსტრუქტაჟი ჩაუტარა და დაემუქრა “ნაციონალურ მოძრაობას”, რომ თუ აქტიურ ქმედებებს არ განახორციელებენ სააკაშვილის გამოსახსნელად ვერ მიიღებენ დაფინანსებას. რაც მან დატოვა ქვეყანა და გაიქცა, აქედან ერთ საათში “ნაცმოძრაობა” ორკესტრირებულად იწყებს ქმედებებს, რომელიც არ ჯდება არაფერში და, მით უფრო, არ ჯდება იმ კონტექსტში, რაც პრეზიდენტის მიერ არის დაანონსებული. სრულიად მიუღებელია ის ულტიმატუმი, რომელსაც უყენებენ არა მმართველ ძალას, არამედ – საზოგადოებასა და ქვეყანას და მათი კარვებში წამოწოლაც სრულიად გაუგებარია. ერთი მეტრის რადიუსში აქვთ კომფორტული ოფისი, რომელსაც ციხე-სიმაგრეს ეძახდნენ, როცა მელია ჰყავდათ იქ შეხიზნული და იქ ახლა თბილად მოკალათებულია „ნაცმოძრაობის” რამდენიმე ლიდერი, თავიანთ ამომრჩევლებს უკიჟინებენ კი ერთი მეტრის რადიუსში, სიცივეში წამოწვნენ, თითქოს, ამით რაიმე შედეგს მიაღწევენ“, – განაცხადა ღუდუშაურმა.