გამდიდრების ფორმულა ბებია-ბაბუისგან – სად და როგორ დააგროვა მიხეილ სააკაშვილის დედამ, გიული ალასანიამ 135 მილიონი ლარის ქონება? პატიმარი ექსპრეზიდენტის დედა „ქრონიკის“ კითხვაზე პასუხობს, რომ რაც აქვს, მშობლებისგან, ბებია-ბაბუისგან არის დატოვებული.
„ყველაფერი, რაც მაქვს, მშობლებისგან, ბებიისა და ბაბუისგან არის დატოვებული. მე თვითონ არაფერი შემიძენია პრაქტიკულად“, – აცხადებს ექსპრეზიდენტის დედა.
ირკვევა, რომ გიული ალასანიას საკუთრებაში ყვარელსა და ოზურგეთში 5 მიწის ნაკვეთია, რომლის საბაზრო ღირებულება, 1 792 000 ლარს შეადგენს. გარდა მიწის ნაკვეთებისა, გიული ალასანიას საკუთრებაში თბილისსა და ბათუმში 5 საცხოვრებელი ბინა აქვს, რომელთა საბაზრო ღირებულება 1 747 000 ლარს აღემატება.
პატიმარ სააკაშვილის დედის სახელზე საქართველოში რეგისტრირებულია 17 კომპანია, მათი დირექტორიც და დამფუძნებელიც თავად არის. აქედან მხოლოდ 4 კომპანია მოქმედებს, რომელთა ჯამურმა ბრუნვამ 2019- 2021 წლებში 73 მილიონი ლარი შეადგინა.
გარდა ამისა, 2003 წლიდან გიული ალასანია საუნივერსიტეტო ბიზნესში ჩაერთო და საქართველოს უნივერსიტეტი დააარსა. ტექნიკური უნივერსიტეტისთვის ჩამორთმეული ქონება კოსტავას ქუჩის 77 ნომერში ეკონომიკის სამინისტროს აუქციონზე გავიდა, რომელშიც მონაწილეობა მხოლოდ სააკაშვილის დედამ მიიღო. გიული ალასანია ამ ქონების მეპატრონე 1 220 000 დოლარად გახდა, სახელმწიფომ კი მაშინ 15 მილიონ დოლარზე მეტი იზარალა.
არსებული ინფორმაციით, გიული ალასანია შპს „შავი ზღვის საერთაშორისო უნივერსიტეტის“ ერთ-ერთ მესაკუთრედ ითვლება. ამ ორგანიზაციას საკუთრებაში აქვს თბილისში, კახეთის გზატკეცილზე, ყოფილი ,,ავტოვაზის“ მიმდებარედ მიწის ნაკვეთი, მასზე განთავსებული შენობა-ნაგებობებით, რომლის საორიენტაციო ღირებულება 32 მილიონ ლარზე მეტია, კომპანიის ბრუნვა 2019-2021 წლების პერიოდში 14 მილიონ ლარზე მეტი შეადგინა.
გიული ალასანიას მფლობელობაში უძრავი ქონება საქართველოს ფარგლებს გარეთაც არსებობს, მაგალითად, უკრაინაში. კერძო სახლი კიევიდან 23 კილომეტრის მოშორებით, ელიტურ დასახლებაში მდებარეობს. ნახევარ მილიონად შეფასებული აპარტამენტები მაიამის სამხრეთ სანაპიროზე და 2 უძრავი ქონება ნიუ-იორკში.