კანონის მიხედვით, 1 მარტს უნდა ამოქმედდეს ორივე სამსახური, შესაბამისად, ამ კვირაში გადაწყვეტილების მიღება გვიწევს, – ასე უპასუხა „ქართული ოცნების“ თავმჯდომარემ, ირაკლი კობახიძემ კითხვას, ხომ არ იქნებოდა მიზანშეწონილი პერსონალურ მონაცემთა დაცვისა და სპეციალური საგამოძიებო სამსახურების ხელმძღვანელთა არჩევა იქამდე, ვიდრე საკონსტიტუციო სასამართლო სახელმწიფო ინსპექტორის სამსახურის ხელმძღვანელის, ლონდა თოლორაიას სარჩელს განიხილავდა.
„სარჩელის შეტანა ყველას შეუძლია, მაგრამ ეს ვერ განაპირობებს პარლამენტის დღის წესრიგს. ჩვენ პარლამენტში გვაქვს საკუთარი დღის წესრიგი, რომლის მიხედვითაც ამ კვირაში უკვე განიხილება ეს საკითხი როგორც კომიტეტის დონეზე, ასევე პლენარულ სხდომაზე. სარჩელი როდის განიხილება, ეს არავინ იცის, პარლამენტს კი მისაღები აქვს გადაწყვეტილება. კანონის მიხედვით, 1 მარტს უნდა ამოქმედდეს ორივე სამსახური, შესაბამისად, ამ კვირაში გადაწყვეტილების მიღება გვიწევს. მე მგონია, რომ ამ სარჩელს პერსპექტივა არ აქვს კონკრეტული სამართლებრივი მიზეზების გამო, თუმცა ჩვენ უნდა მივყვეთ კანონის ვადებს. საგამოძიებო სამსახურის ხელმძღვანელის თანამდებობაზე ორი კანდიდატურაა წარმოდგენილი. კომიტეტი მათ მოუსმენს და წარმოადგენს საკუთარ რეკომენდაციას, სამშაბათს კი პლენარულ სხდომაზე ამის მიხედვით მიიღებს გადაწყვეტილებას. ხვალვე შეიკრიბება უმრავლესობა და ჩამოვყალიბდებით კონკრეტული კანდიდატების მხარდაჭერაზე“, – ამბობს კობახიძე.
2021 წლის 30 დეკემბერს პარლამენტმა სახელმწიფო ინსპექტორის სამსახურის ორ უწყებად გაყოფას მხარი დაუჭირა. ცვლილებების პაკეტი სახელმწიფო ინსპექტორის სამსახურის ბაზაზე ორი ერთმანეთისგან დამოუკიდებელი უწყების: პერსონალურ მონაცემთა დაცვისა და სპეციალური საგამოძიებო სამსახურების შექმნას ითვალისწინებს. ამ ცვლილების შედეგად, 2022 წლის 1 მარტიდან სახელმწიფო ინსპექტორის სამსახური გაუქმებულია. ამავე პერიოდიდან თანამდებობიდან თავისუფლდებიან სახელმწიფო ინსპექტორი და მისი მოადგილეები.
პრემიერის შესაბამისი ბრძანებებით, სპეციალური საგამოძიებო სამსახურის უფროსისა და პერსონალურ მონაცემთა დაცვის სამსახურის უფროსის შესარჩევი კონკურსები გამოცხადდა. საკონკურსო კომისიამ კანდიდატურები პრემიერ-მინისტრს წარუდგინა, მთავრობის მეთაურმა კი პარლამენტს პერსონალურ მონაცემთა დაცვის სამსახურის უფროსის თანამდებობაზე ასარჩევად ლელა ჯანაშვილის და თამარ ალფაიძის, ხოლო სპეციალური საგამოძიებო სამსახურის უფროსის თანამდებობებზე ემზარ გაგნიძისა და კარლო კაციტაძის კანდიდატურები წარუდგინა, რომლებიც განსახილველად პარლამენტის შესაბამის კომიტეტებს გადაეცათ.