მიგრაციის საერთაშორისო ორგანიზაციის (IOM) მხარდაჭერით, ევროკავშირის მიერ დაფინანსებული პროექტის – „ევროკავშირი უსაფრთხოებისთვის, ანგარიშვალდებულებისა და დანაშაულის წინააღმდეგ ბრძოლისთვის საქართველოში (SAFE) – ინტეგრირებული საზღვრის მართვა (SAFE IBM)“ ფარგლებში, ყალბი დოკუმენტების აღმოჩენისა და შემოწმების შესახებ, ფინანსთა სამინისტროს შემოსავლების სამსახურისა და საქართველოს შინაგან საქმეთა სამინისტროს თანამშრომლებისთვის უწყებათაშორისი სწავლება გაიმართა.
უწყებათაშორისი სამუშაო ჯგუფის წევრების ჩართულობით მიმდინარე სემინარს საერთაშორისო ექსპერტი – ალექს ვან დუურენი უძღვებოდა. პრაქტიკული სწავლების გახსნის ცერემონიას ესწრებოდნენ: ფინანსთა სამინისტროს შემოსავლების სამსახურის საბაჟო დეპარტამენტის უფროსის მოადგილე – ირაკლი თევდორაძე, შინაგან საქმეთა სამინისტროს საპატრულო პოლიციის დეპარტამენტის დირექტორის მოადგილე – გურამ დავითაშვილი, მიგრაციის საერთაშორისო ორგანიზაციის საზღვრის მართვის პროგრამების უფროსი მენეჯერი მასიმო რამანზინი და საქართველოში ევროკავშირის დელეგაციის წარმომადგენელი კოლომბ დე მერსი.
აღნიშნული ტრენინგის მიზანია გაიზარდოს ცნობიერება ყალბი საერთაშორისო სამგზავრო დოკუმენტების ამოცნობის მიმართულებით, რაც თავის მხრივ გააუმჯობესებს საზღვრის უკანონო კვეთის კონტროლის ეფექტურობას.
აღსანიშნავია, რომ ევროკავშირისა და მიგრაციის საერთაშორისო ორგანიზაციის (IOM) მხარდაჭერით საქართველოს შინაგან საქმეთა სამინისტროს საპატრულო პოლიციის დეპარტამენტსა და ფინანსთა სამინისტროს შემოსავლების სამსახურს ერთდროულად უკვე გადაეცა პასპორტის წამკითხველი უახლესი აღჭურვილობა, რაც მათ დაეხმარება, კომპეტენციის ფარგლებში, ეფექტურად განახორციელონ საპასპორტო კონტროლის პროცედურები.
სემინარის დასრულების შემდეგ, მონაწილეებს შესაბამისი სერტიფიკატები გადაეცათ.
ევროკავშირისა და მიგრაციის საერთაშორისო ორგანიზაციის (IOM) მხარდაჭერით გამართული სწავლებები და შედეგებზე ორიენტირებული თანამშრომლობა მომავალშიც აქტიურად გაგრძელდება.