მოკლული პროგრამისტის, ნიკო კვარაცხელიას დედა სოციალურ ქსელში მიმართვას ავრცელებს. იზა ომაძე წერს, რომ აქვს უტყუარი ინფორმაცია, რომ გიორგი კაველაძეს აღიარებული აქვს დანაშაული და სწორედ მისი აღიარებითი ჩვენებიდან ირკვევა, რომ ეს იყო დიდი ჯგუფის მიერ ჩადენილი დანაშაული.
„მინდა დავარღვიო დუმილი და მოგაწოდოთ უტყუარი ინფორმაცია, რომელიც არა მარტო ჩვენმა ოჯახმა, არამედ ბევრმა ადამიანმა იცის, რომ გიორგი კავილაძეს აქვს აღიარებული დანაშაული. მას დეტალურად აქვს აღწერილი დანაშაულის მომზადების ყველა დეტალი და დასახელებული ჰყავს დამკვეთიც, დამხმარეც და საკუთარ როლზეც ბევრი აქვს ნათქვამი. ეს იყო ძალიან დიდი ჯგუფის მიერ ჩადენილი დანაშაული, როგორც მისი აღიარებითი ჩვენებიდან ვიცით. ჯგუფურს მარტო კავილაძე და ჭელიძე კი არა სხვა ახალგაზრდებიც ვერ დააღწევენ თავს“,- წერს იზა ომაძე.
ნიკა კვარაცხელიას განზრახ მკვლელობის საქმე შინაგან საქმეთა სამინისტრომ გახსნილად 18 სექტემბერს გამოაცხადა. როგორც შსს-ს მიერ გავრცელებულ ინფორმაციაშია აღნიშნული, ნიკა კვარაცხელიას მიმართ 10-ზე მეტი გასროლა განხორციელდა, სავარაუდო დამნაშავემ კი ტერიტორია თანამზრახველთან ერთად ნაქირავები მანქანით დატოვა.
20 სექტემბერს ნიკა კვარაცხელიას მკვლელობაში ბრალდებულებს პატიმრობა შეეფარდათ.