ისეთი ადამიანი, რომელიც შრომისუნარიანია და იღებს სოციალურ დახმარებას, გვყავს დაახლოებით 200 ათასზე ცოტა მეტი. ყველას იდენტიფიცირება მოვახდინეთ და ვფიქრობთ, რომ კერძო სექტორი, იმ ინიციატივების ფარგლებში, რომელიც საქართველოს პრემიერ-მინისტრს გააჩნია, კიდევ უფრო მეტი სამუშაო ადგილის გენერირებას გააკეთებს და ადამიანები შეძლებენ დასაქმებას როგორც კერძი, ასევე საზოგადოებრივ სამუშაოებში და საბოლოოდ, ჩვენი მოქალაქეები მეტ შემოსავალს მიიღებენ, – ამის შესახებ ეკონომიკის მინისტრმა, ლევან დავითაშვილმა „ქრონიკაში“ სოციალურად დაუცველი მოქალაქეების დასაქმების პროგრამაზე საუბრისას განაცხადა.
მისი თქმით, თუ ადამიანები დასაქმდებიან ან თვითდასაქმებულები ლეგალურად დეკლარირებას ახდენენ თავიანთი სამუშაოს შესახებ, ამ ადამიანებს სრულად, 4 წლის განმავლობაში უნარჩუნდებათ ის სოციალური პაკეტი, რომელიც დღეს აქვთ.
„ამ პროექტზე მუშაობა სხვადასხვა უწყებასთან ერთად მიდიოდა. საქართველოს პირობებში ეს მორგებულია აქაურ რეალობას და ვფიქრობ, მაქსიმალურად ითვალისწინებს სოციალურად დაუცველი მოსახლეობის ინტერესებს. უპირველესი არის ამ მოსახლეობის სოციალური ინტერესების დაცვა, მათი მდგომარეობის გაუმჯობესება და გრძელვადიან პერსპექტივაში მათი ინტეგრაცია უკვე ტრადიციულ, შრომით ბაზარზე. ჩვენ, დაახლოებით 50 ათასი ადამიანი შეიძლება საზოგადოებრივი სამუშაოების კუთხით დავასაქმოთ, თუმცა ეს არის მხოლოდ ის, რასაც სახელმწიფო თვითონ ქმნის ამ პროგრამის ფარგლებში, მაგრამ პროგრამა ითვალისწინებს ისევ და ისევ ჩვენი მოსახლეობისთვის არსებულ შრომის ბაზარზე, კერძო სექტორში დასაქმების შესაძლებლობებს.
იმ შემთხვევაში, თუ ადამიანები დასაქმდებიან ან თვითდასაქმებულები ლეგალურად დეკლარირებას ახდენენ თავიანთი სამუშაოს შესახებ, ამ ადამიანებს სრულად, 4 წლის განმავლობაში უნარჩუნდებათ ის სოციალური პაკეტი, რომელიც დღეს აქვთ და სტატუსი, რაც ამ ადამიანებს გარკვეულ დაცულობას ანიჭებთ“, – განაცხადა ეკონომიკის მინისტრმა.
პრემიერ მინისტრ ირაკლი ღარიბაშვილის ინიციატივით, მთავრობა სოციალური შემწეობის მიმღებ შრომისუნარიან პირებზე ორიენტირებულ დასაქმების აქტიურ პოლიტიკას იწყებს.