მე კიდევ ერთხელ მინდა სოლიდარობა გამოვხატო უკრაინისა და უკრაინელი ხალხის მიმართ. გუშინ მე ვთქვი, რომ სუვერენულ სახელმწიფოზე თავდასხმა სამხედრო მოქმედებებით აბსოლუტურად მიუღებელია და ის ეწინააღმდეგება საერთაშორისო სამართლის პრინციპებს, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებთან განაცხადა.
მისივე თქმით, საქართველო და მისი ხელისუფლება, თავისი შესაძლებლობის ფარგლებში აკეთებს ყველაფერს იმისთვის, რომ პოლიტიკური და ჰუმანიტარული მხარდაჭერა აღმოუჩინოს უკრაინას.
„რა თქმა უნდა, ის, რაც დღეს უკრაინაში ხდება, დიდი ტრაგედიაა. ამ ომით, რომელიც სამწუხაროდ, ვერ იქნა შეკავებული და თავიდან აცილებული, ყველაზე მეტად დაზარალდება უკრაინა, როგორც სახელმწიფო, მისი სუვერენიტეტი, ტერიტორიული მთლიანობა და უკრაინელი ხალხი, უკრაინელი ჯარისკაცები. შესაბამისად, ამ ომს არანაირი გამართლება არ აქვს“, – განაცხადა ღარიბაშვილმა.