პოლონეთის პრემიერ-მინისტრის, მატეუშ მორავიეცკის განცხადებით, უკრაინაში ნატოს სამშვიდობო მისიის გაგზავნის მომხრე ქვეყნების რიცხვი გაიზარდა.
„ბოლო დღეებში მედიიდან შევიტყვეთ, რომ ამ იდეას დადებითი რეაგირება მოჰყვა დანიასა და ლიეტუვაში. დღეს შემიძლია გითხრათ, რომ სხვა წევრმა ქვეყნებმაც გამოთქვეს მზადყოფნა, თუმცა ისინი ელოდებიან გარკვეულ მხარდაჭერას და ნატოს საერთო პოზიციას. ხაზს ვუსვამთ, ეს უნდა იყოს ნატოს მისია“, – განაცხადა მორავიეცკიმ.
მანამდე ვარშავის ინიციატივას თეთრი სახლის ოფიციალური წარმომადგენელი, ჯენ ფსაკი გამოეხმაურა. მისი თქმით, თეთრმა სახლმა არაერთხელ განაცხადა, რომ რუსეთთან საომრად ამერიკელი სამხედროების გაგზავნას არ აპირებს, თუმცა ვაშინგტონი აგრძელებს რამდენიმე სცენარზე მსჯელობას და მათ შორისაა სამშვიდობოების გაგზავნის ინიციატივაც.
პოლონეთის პრემიერ-მინისტრის, მატეუშ მორავიეცკის განცხადებით, უკრაინა დამოუკიდებელი ქვეყანაა და მას აქვს უფლება, საფრთხის არსებობის შემთხვევაში, თავის ტერიტორიაზე ნებისმიერი ქვეყნის ან ორგანიზაციის ჯარები მოიწვიოს.