დიდი ბრიტანეთის თავდაცვის სამინისტროს ცნობით, დაწესდა სანქციები რუსეთის კომპანია „Кронштадт”-ის წინააღმდეგ, რომელიც დრონ „ორიონისა“ და სხვა უპილოტო საფრენი აპარატების ძირითადი მწარმოებელია. უწყების მიერ ტვიტერზე გამოქვეყნებული ინფორმაციის თანახმად, უკრაინის გაძლიერებული ანტისაჰაერო თავდაცვის გამო, რუსეთი იძულებული გახდა შეეზღუდა ავიაიერიშები ფრონტის ხაზის მიღმა და გადავიდა უპირატესად უპილოტო საფრენი აპარატების გამოყენებაზე.
შესაბამისად, ბრიტანეთი ვარაუდობს, რომ რუსეთს უკრაინასთან ომში ბევრად მეტი დრონი დასჭირდება, ხოლო დაწესებული სანქციები მას მარაგის შევსების შესაძლებლობას არ მისცემს.
„ეს სანქციები დააზარალებს რუსეთის თავდაცვით მრეწველობას და შეზღუდავს შესაძლებლობას, რომ ჩაანაცვლოს გამოყენებული უპილოტო საფრენი აპარატები“, – ვკითხულობთ დიდი ბრიტანეთის თავდაცვის სამინისტროს ცნობაში, რომელიც ტვიტერზე ქვეყნდება.