წლის ბოლოსთვის ინფლაცია ერთნიშნა მაჩვენებელზე ჩამოვა, – ამის შესახებ ეროვნული ბანკის ვიცე-პრეზიდენტმა, პაპუნა ლეჟავამ განაცხადა. მისივე განმარტებით, მიუხედავად იმისა, რომ გეოპოლიტიკური მდგომარეობა დაძაბულია, მიმდინარე თვიდან ინფლაცია კლებას დაიწყებს.
„გეოპოლიტიკურ მოვლენებს რეგიონში ბუნებრივია, აქვს გავლენა საქართველოზეც, ჩვენს ეკონომიკაზე და საბანკო სექტორზე. გარდა ამისა, ახალი გამოსულია ჩვენი ეკონომიკა და საბანკო სექტორი კოვიდისკრიზისიდან, რამაც ჯამურად დიდი დარტყმა მიაყენა ეკონომიკას. კონკრეტულ დეტალებში არ შევალ, თუმცა ეს გეოპოლიტიკური გავლენა იქნება ფინანსურ და ეკონომიკურ სექტორზე უფრო მცირე, ვიდრე პანდემიის დროს. რაც შეეხება ინფლაციას, წლის ბოლოსთვის ვფიქრობთ, რომ ჩამოვა ერთნიშნა ნიშნულზე.
მარტის ინფლაციაც უკვე შემცირებული იქნება წინა პერიოდებთან შედარებით. თუმცა ჯამურად შეიძლება, ითქვას, რომ წლის განმავლობაში ინფლაცია მაღალ ნიშნულზე შენარჩუნდება. ამის მიუხედავად შემცირება ეტაპობრივად უკვე დაიწყება“,განაცხადა პაპუნა ლეჟავამ.