7 ნოემბრის საქმეზე დღეს მიხეილ სააკაშვილის მორიგი სასამართლო პროცესი იმართება. სხდომა ცოტა ხნის წინ დაიწყო. ბრალდებულმა სხდომის დაწყებისას, პოლიტიკური განცხადებები და მოწოდებები გააკეთა. ყოფილმა პრეზიდენტმა საკუთარ თავს პუტინის პირადი პატიმარი უწოდა და საზოგადოებას აქტიურობისა და დაუმორჩილებლობისკენ მოუწოდა.
„ჩვენ ამ მთავრობას თუ არ მოვაშორებთ, თუ ჩვენ არ მოვახერხებთ ხალხის მობილიზაციას, თუ ჩვენ, ყველანი არ გამოვალთ ქუჩებში, თუ ჩვენ მშვიდობიანად არ შევცვლით საქართველოში სიტუაციას, თუ ჩვენ არ მოვახერხებთ საქართველოში ამათ ჩამოშორებას ხელისუფლებისგან, საქართველო დაღუპულია. საქართველოს ერთადერთი გადარჩენა არის მობილიზაციაში, საქართველოს გამოფხიზლებაში, ერთად დგომაში, ხელის ჩაკიდებაში. დავამთავროთ პარლამენტარობანას თამაში – ჩვენ ამ მთავრობას ვაიძულებთ, ამ მთავრობას გავაკეთებინებთ. რას გააკეთებინებთ, ვის გააკეთებინებთ, მოღალატეები არიან, რუსების პირდაპირი დასმული შვილები, პირდაპირი აგენტები არიან. მხოლოდ ამ მთავრობის ჩამოშორებით, მხოლოდ ამ მთავრობის ჩამოგდებით, მხოლოდ მასობრივი აქციებით, მხოლოდ მასობრივად ხელის ჩაჭიდებით ვერ დაგარბევენ“, – განაცხადა სააკაშვილმა.
მან ასევე მოსამართლეებსა და პროკურორებს, სიტყვიერი შეურაცხყოფაც მიაყენა, რის შემდეგაც მის მაგალითს დარბაზში მსხდომი მისი მხარდამჭერები მიჰყვნენ. მოსამართლეებმა ისინი დარბაზიდან გააძევეს, პროკურორმა კი მოითხოვა, რომ ჯემალ ქიქავას მისამართით სისხლის სამართლებრივი დევნა დაიწყოს.
„სასამართლო სხდომის დარბაზი არის სასამართლო სხდომის დარბაზი. თუ ვაკეთებთ იმას, რომ ვაძლევთ პიროვნებას საშუალებას, გამოთქვას გარკვეული მოსაზრებები საკითხებთან დაკავშირებით, ეს იმას არ ნიშნავს, რომ აქ გადაიზარდოს მოწოდებებში, დამხობისკენ მოწოდება იქნება, თუ რაც იქნება, თუ გინდათ ქუჩაში გამოსვლისკენ. და სასამართლოს ეძახოს, რომ არის ისეთი და ასეთი. ძალიან დიდი ბოდიში, მაგრამ ყველანი მოვდივართ 90-იანი წლებიდან, გამოვიარეთ ყველაფერი, 1993 წელიც, 2008 წელიც და ბევრ ჩვენგანს, ოჯახის წევრებსაც მონაწილეობა მიუღიათ ამ ყველაფერში. არავის ნაკლებად არ უყვარს თავისი ქვეყანა, ეს უნდა გავითვალისწინოთ. პიროვნულად ყველამ უნდა ვცეთ პატივის იმას, რა რასაც ვაკეთებთ, რა საქმიანობასაც ვახორციელებთ. თუ მსგავსი მოწოდებები კვლავ იქნება სასამართლო სხდომაზე, სასამართლოს მოუწევს კიდევ ერთხელ იმის განმარტება, რომ აქ ამის გულისთვის არ უნდა ვიაროთ“, – განაცხადა მოსამართლე ნინო ელიეშვილმა.