რუსეთის მიერ ანექსირებული ყირიმის ხელისუფლება აპირებს, უკრაინელი პოლიტიკოსებისა და ოლიგარქების ნაციონალიზაციას დაქვემდებარებული ქონების სიაში შეიტანოს უკრაინის პრეზიდენტის, ვოლოდიმირ ზელენსკის ოჯახის იალტაში მდებარე ბინა. ამის შესახებ საინფორმაციო სააგენტოები “ინტერფაქსი” და “რია ნოვოსტი” ანონიმურ წყაროებზე დაყრდნობით იუწყებიან.
მანამდე ანექსირებული ყირიმის ხელმძღვანელმა სერგეი აქსიონოვმა განაცხადა, რომ დაგეგმილი იყო იმ უკრაინელი ოლიგარქების, პოლიტიკოსებისა და ჩინოვნიკებისთვის ყირიმში არსებული ქონების ნაციონალიზაცია, რომლებსაც რუსეთის საწინააღმდეგო განწყობები აქვთ. “ქონების სია, რომელიც დაყადაღებას დაქვემდებარება კვირის ბოლომდე იქნება მზად, გადაწყვეტილებას ყირიმის პარლამენტი დააკანონებს”,- დასძინა აქსიონოვმა.
რუსეთის მიერ უკრაინის ნახევარკუნძულის ანექსიამდე, 2013 წელს, ლივადიაში სახლი ზელენსკის მეუღლემ, ელენა ზელენსკიმ იყიდა. უძრავი ქონების შესახებ ცნობილი 2019 წელს, უკრაინაში საპრეზიდენტო კამპანიის დროს გახდა. მაშინ არჩეული პრეზიდენტის პრესსამსახურმა მიუთითა, რომ ზელენსკის ოჯახს 2014 წლის შემდეგ არასოდეს გამოუყენებია უძრავი ქონება ნახევარკუნძულზე, ბინა კი ოფიციალურად დეკლარირებულია.
„ზელენსკის ოჯახი ამ ქონების გამოყენებას მხოლოდ ყირიმის უკრაინისთვის დაბრუნების შემდეგ აპირებს“, – აცხადებენ პრესსამსახურში.
უკრაინის პრეზიდენტმა ვლადიმირ ზელენსკიმ 10 მარტს მოაწერა ხელი კანონს, უკრაინაში რუსეთის მოქალაქეების ქონების ნაციონალიზაციის შესახებ.
რუსეთმა უკრაინის წინააღმდეგ 2014 წელს განხორციელებული სამხედრო აგრესიის შედეგად ყირიმის ანექსია მოახდინა, რუსეთის მიერ მხარდაჭერილმა სეპარატისტებმა კი დონეცკის და ლუგანსკის რეგიონების ნაწილი ე.წ. დამოუკიდებელ რესპუბლიკებად გამოაცხადეს.