პარლამენტის პლენარულ სხდომათა დარბაზში, ტექნიკური შესვენების დროს, დეპუტატებს მიხეილ ყაველაშვილსა და ხატია დეკანოიძეს შორის შელაპარაკება მოხდა. „ქართული ოცნების“ წევრის მიხეილ ყაველაშვილის თქმით, ის დაინტერესდა, რატომ არ მიდიოდა „ნაციონალური მოძრაობა“ უკრაინაში საპარლამენტო დელეგაციასთან ერთად.
როგორც დეპუტატმა „ქრონიკასთან“ აღნიშნა, დეკანოიძეს უკრაინული ტელეარხისთვის მიცემული ინტერვიუც გაახსენა, სადაც ოპოზიციონერმა დეპუტატმა საქართველოს ხელისუფლება რუსეთის ინტერესების სასარგებლოდ მოქმედებაში დაადანაშაულა.
„ჩემი კითხვა ეხებოდა უკრაინაში გამგზავრებას. მთელი ამ დღეების განმავლობაში ძალიან აღტკინებით საუბრობდნენ, განსაკუთრებით ხატია დეკანოიძე, რომ რატომ არ ვსტუმრობთ უკრაინას და ჩემი კითხვა იყო: როცა გადაწყდა დელეგაციის უკრაინაში წასვლა, რატომ არ მიემგზავრება „ნაციონალური მოძრაობა“, მით უმეტეს, რომ ინიციატორი ხატია დეკანოიძე იყო. მე მას ასევე ვკითხე, თუ ის თავიდან თანახმა იყო, პარტიამ ხომ არ დააბულინგა და ამ შეკითხვამ გააღიზიანა. ის თავად აღნიშნავს, რომ მიესალმება პარლამენტის თავმჯდომარის გამგზავრებას და თვითონ არ მიდის, ე.ი თავის სურვილია და პარტია უარს ეუბნება? სწორედ ამაზე გაღიზიანდა, რომ მას ვერავინ უკარნახებს რა გააკეთოს.
მე მას ასევე მივუთითე, რომ როდესაც უცხო ტელევიზიაში, (რაც არ უნდა ახლობელი იყოს ვინმესთვის ის ქვეყანა, მაინც საქართველოს მოქალაქეა და საქართველოს პარლამენტის წევრია) საკუთარი ქვეყნის ხელისუფლებას ასე მოიხსენიებს, ეს სამაგალითო უნდა იყოს, როგორ არ უნდა მოიქცეს ქართველი პოლიტიკოსი, როდესაც უცხო ქვეყანაში მოუწევს ინტერვიუს მიცემა. სულ მოგვიწოდებდნენ, რატომ არ მიდიხართ უკრაინაშიო, ახლა, როგორც კი გამოიკვეთა, რომ დალაგდა სიტუაცია, ეს მათ ეწყინათ“, – განაცხადა მიხეილ ყაველაშვილმა.
ხატია დეკანოიძემ უკრაინულ ტელეარხთან ინტერვიუში განაცხადა: „სიმართლე გითხრათ, ვერასდროს ვიფიქრებდი, რომ საქართველოს ხელისუფლებაში იქნებოდნენ ადამიანები, რომლებიც ამ რთულ დროს, როდესაც უკრაინაში ადამიანები იღუპებიან და მთელი საერთაშორისო თანამეგობრობა პუტინისა და რუსეთის ეკონომიკის წინააღმდეგ ასეთ მკაცრ სანქციებს აწესებს, ქართველები, ანუ საქართველოს ხელისუფლება ეძებენ რაღაც შავ ხვრელებს, რომ დაეხმარონ პუტინს, შექმნას იარაღი, რათა შემდეგ მოკლას“.