სულ მცირე ექვსი ადამიანი დაიღუპა და 11 დაიჭრა სამი აფეთქების შედეგად, რომლებიც მოხდა ბიჭების სკოლასთან, ქაბულის შიიტურ უბანში 19 აპრილს – იუწყება ავღანეთის პოლიცია.
თალიბანის შინაგან საქმეთა სამინისტროს პრესმდივანმა რადიო თავისუფლებას უთხრა, რომ აფეთქებები განხორციელდა აბდულ რაჰიმ შაჰიდის სკოლაში, რომელიც მდებარეობს დედაქალაქის დასავლეთში, დაშტ-ე-ბარჩის უბანში. ეს უბანი ძირითადად ჰაზართა თემით არის დასახლებული და უწინ გამხდარა ექსტრემისტული ჯგუფის, “ისლამური სახელმწიფოს” თავდასხმათა სამიზნე.
მსხვერპლთა შორის არიან ბავშვებიც, თუმცა მათი რაოდენობა ჯერჯერობით დაზუსტებული არ არის.
უსაფრთხოების წარმომადგენელი გერმანიის სააგენტო dpa-ს ატყობინებს, რომ აფეთქებები ხელის ჭურვებმა გამოიწვია.
ჯერჯერობით თავდასხმაზე პასუხისმგებლობა არავის უკისრია.
თალიბანის შინაგან საქმეთა სამინისტროს განცხადებით, ადგილზე მუშაობს გამომძიებელთა ჯგუფი. თვითმხილველის თქმით, აფეთქებები მოხდა მაშინ, როცა მოსწავლეები დილის გაკვეთილებიდან გამოდიოდნენ.
შარშან მაისში ამავე უბნის სკოლასთან განხორციელებულ აფეთქებებს ემსხვერპლა სულ მცირე 85 სამოქალაქო პირი, ძირითადად სკოლის მოსწავლე გოგონები, დაიჭრა ათობით ადამიანი.