ჩეჩნეთის რესპუბლიკის პრეზიდენტის, რამზან კადიროვის შვილებმა თავიანთ მწვრთნელს, აბდულ-კერიმ ედილოვს დაბადების დღეზე ახალი ”პორშე პანამერა” აჩუქეს. ამის შესახებ, შერეული საბრძოლო ხელოვნების მრავალგზის პრიზიორმა სოციალურ ქსელში დაწერა და ინსტაგრამზე ავტომობილის ფოტოც გამოაქვეყნა.
”მადლობა ღმერთს იმისათვის, რომ მაჩუქა ყველაფერი ამ ცხოვრებაში, განსაკუთრებით კი ისეთი ძმები, როგორებიც ახმადი, ელი და ადამი არიან. მათთან ერთად ბევრ დროს ვატარებ და სიტყვებით ვერ გადმოვცემ, როგორ მიყვარს ისინი. გუშინ დაბადების დღე მქონდა და ისეთი საჩუქარი გამიკეთეს, როგორზეც ვერც კი ვიოცნებებდი – მაჩუქეს ავტომობილი ”პორშე პანამერა”, – წერს ედილოვი და იქვე დასძენს, ასეთ საჩუქარს ნამდვილად არ ვიმსახურებდი და ცხოვრების ბოლომდე თქვენს გვერდით მიგულეთო. სპორტსმენმა მადლობა, რა თქმა უნდა, თავად რამზან კადიროვსაც გადაუხადა.
გავრცელებული ინფორმაციით, კადიროვს 10 შვილი ჰყავს – ექვსი ქალიშვილი და ოთხი ვაჟი. მეოთხე ვაჟი აბდულა მას ახლახან, ოქტომბერში შეეძინა. აქვე ვთქვათ, რომ ადამ კადიროვს, თავის დაბადების დღეზე Merсedes SLS AMG აჩუქეს შესაბამისი სანომრე ნიშნით КАР (Кадыров Адам Рамзанович) 008 (ბავშვი 8 წლისაა).
www.autobild.ge