ჩვენ არაერთხელ დავამტკიცეთ, რომ საქართველო ნატო-ში გასაწევრიანებლად ყველაფერს აკეთებს და ეს ჩემი სიტყვები არ არის, – განაცხადა საპარლამენტო უმრავლესობის წარმომადგენელმა, მიხეილ ყაველაშვილმა საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“.
„ნატო-ს მაღალი რანგის წარმომადგენლები ხშირად აღნიშნავენ, რომ საქართველო ამ მხრივ, გამორჩეულია და ყოველთვის ასრულებს არსებულ შეთანხმებებს, რომელიც ნატო-საქართველოს ფორმატში წარმოიშობა ხოლმე. ნატო-ში გაწევრიანება კონსტიტუციაშიც გვაქვს ჩაწერილი და ამისთვის ჩვენი ქვეყანა, მოსახლეობა მზად არის. ეს ჩვენი დიდი ხნის ოცნებაა, თუმცა დაველოდოთ პროცესებს, როგორ განვითარდება. ჩვენ მზად ვართ, რომ ნატო-სა და ევროკავშირის წევრები გავხდეთ. ეს არის ჩვენი ქვეყნის საკმაოდ დიდი ხნის ოცნება“, – განაცხადა ყაველაშვილმა.
მაკა ცინცაძის კითხვაზე, რა შანსი აქვს საქართველოს ევროკავშირში კანდიდატის სტატუსის მისაღებად და აქვს თუ არა ხელისუფლებას მოლოდინი, რომ ქვეყანა ამ სტატუსს მიიღებს, მიხეილ ყაველაშვილმა განაცხადა, რომ ხელისუფლება დარწმუნებულია, შევსებული კითხვარი ევროკავშირისთვის დამაკმაყოფილებელი იქნება, რადგან ეს პროცესი საკმაოდ დიდი ხანია მიმდინარეობს, მუშაობა ყოველდღიურ რეჟიმში მიმდინარეობდა და ქვეყანა ამისთვის მზად იყო.
კითხვაზე, რას უკავშირებს ბრალდებების გააქტიურებას უკრაინის მხრიდან, რადგან თითქოს, გაჩნდა მოლოდინი, რომ საპარლამენტო დელეგაციის ვიზიტის შემდეგ უკრაინა-საქართველოს შორის გაუგებრობა და ბრალდებები ამოიწურა, მაგრამ საქართველოს მიმართ მწვავე რიტორიკა კვლავ ნარჩუნდება, მიხეილ ყაველაშვილმა აღნიშნა, რომ საქართველოს ხელისუფლება ამას გაგებით ეკიდება და უკრაინის ხელისუფლების ზოგიერთი წარმომადგენლის მხრიდან ბრალდებების მიუხედავად, საქართველო აგრძელებს უკრაინის სოლიდარობას, ღირსეულ დამოკიდებულებას, რასაც ქვეყნის მოსახლეობის უმრავლესობა ეთანხმება.
„ჩვენ უკრაინასა და უკრაინელ ხალხს მხარს ვუჭერთ ყველა ფორმატში და საკმაოდ ძლიერადაც. ეს არის, როგორც ჩვენი შინაგანი მოწოდება, ისე ჩვენი ქვეყნის დამოკიდებულება ამ ქვეყანასთან. ეს ნათელია და ამას ყველა კარგად ხედავს. ხშირად, ქილიკის საგანი იყო, თუ რას აკეთებდა საქართველოს ხელისუფლება, თუმცა თვითონ უკრაინაში გამოკითხულთა შორისაც, საქართველო ოთხეულშია, რომელიც ჩვენს მოძმე უკრაინელ ხალხს და სახელმწიფოს ასე ეხმარება. ეს არის რეალობა და ეს არის ფაქტი. მიუხედავად მათი ასეთი გაუგებარი და შეურაცხმყოფელი განცხადებებისა, ჩვენ ყოველთვის სოლიდარული ვიქნებით უკრაინელი ხალხის მიმართ. რა თქმა უნდა, მათი ასეთი მოწოდებები ხშირად გაუგებარია და გაღიზიანებასაც იწვევს, ხშირად, გასაგებიც არის და მიზეზიც შეიძლება, დავადგინოთ, ეს ყველაფერი რატომ ხდება, თუმცა, მკაცრი კრიტიკისგან თავს ვიკავებთ და შევიკავებთ“, – განაცხადა ყაველაშვილმა.
მაკა ცინცაძის კითხვაზე, რამდენად დამაჯერებელია არგუმენტი, რომ ამ ბრალდებების უკან „ნაციონალური მოძრაობა“ დგას, ყაველაშვილმა განაცხადა, რომ გაუგებრობების ერთ-ერთი მთავარი მიზეზი ის არის, რომ არაადეკვატური შეფასებები ხდება იმ ადამიანების მხრიდან, რომლებიც საქართველოში ოპოზიციას წარმოადგენენ და უკრაინაში ხელისუფლებაში იმყოფებიან.
მიხეილ ყაველაშვილმა ასევე აღნიშნა, რომ ჩვენი ქვეყნის ფარგლებს გარეთ, როგორი რთული პროცესიც არ უნდა მიმდინარეობდეს, ყველამ უნდა იცოდეს, პოლიტიკოსი იქნება ეს, თუ ამ ქვეყნის მოქალაქე, რომ პირველ რიგში, ამ ქვეყნის ეროვნული ინტერესებია დასაყენებელი, რასაც საქართველოს ხელისუფლება აკეთებს და მოსახლეობის უმეტესობა ქვეყნის ხელისუფლების მიმართ სოლიდარული ამიტომაც არის.