“დიდი შვიდეულის” ლიდერები უკრაინის პრეზიდენტ ვოლოდმირ ზელენსკისთან ერთად დღეს ვიდეოკონფერენციის საშუალებით ოფიციალური კიევისთვის გაწეულ დასავლურ მხარდაჭერას განიხილავენ.
გერმანიის მთავრობის პრესსპიკერის ცნობით, ვირტუალური შეხვედრის მასპინძელი გერმანიის კანცლერი ოლაფ შოლცი იქნება, ხოლო უკრაინის პირველი პირი ლიდერებს მის ქვეყანაში არსებულ ვითარებაზე მიაწვდის ინფორმაციას.
გამოცემა „გარდიანის“ თანახმად, მოსალოდნელია, რომ განიხილება რუსეთის წინააღმდეგ დამატებითი სანქციების დაწესება ან სულ მცირე, იმ უზარმაზარი ეკონომიკური სასჯელის გამკაცრება, რომელმაც უკვე დააზარალა რუსეთი.
გარდა ამისა, დღეს ბრიუსელში ევროკავშირის წევრი ქვეყნების ელჩების შეხვედრაც გაიმართება.
ისინი ოფიციალური მოსკოვის წინააღმდეგ ეკონომიკური სანქციების მეექვსე პაკეტს განიხილავენ, რომელიც ამჯერად უნდა მოიცავდეს რუსული ნავთობის იმპორტის ეტაპობრივ აკრძალვას.